R1.3- T uutangin, kailangan ba talaga?

Dadaan sa butas ng karayom ang binabalak ng pamahalaang Duterte na mangutang ng P1.3 trilyon sa susunod na taon upang ipantustos sa Build, Build Build program na isinusulong ng administrasyon.

Tiniyak ni Senate President Pro Tempore Ralph Recto na hihimayin nilang maigi ang plano ng gobyerno upang matiyak na mapunta ito sa tama.

Ayon kay Recto, masyadong malaki ang nasabing halaga at lolobo pa ito dahil patuloy ang pagbagsak ng halaga ng piso laban sa dolyar

Ang uutanging P1.3 trilyon ay ipambabayad din daw sa maturing debts at capital outlay na pinasok ng pamahalaan upang maisulong ang programa.

Nagtataka naman si Sen. Panfilo Lacson kung bakit patuloy pa rin ang pangungutang ng pamahalaan.

Aniya, kailangan pag-aralan na rin ng economic advisers kung ang pangungutang ba ang susi para sa kaunlaran ng bansa.

Tinukoy din ni Lacson na nakabimbin ang mga proyekto, bukod sa talamak pa rin ang kurapsiyon, at mahina naman ang koleksiyon ng pamahalaan.