$10 environmental fee sa Bora, pinag-aaralan

MALAY, Aklan - Isinusulong ng pamahalaang lokal ng Malay sa Aklan ang panukala na itaas sa $10 ang environmental fee sa mga turistang bibisita sa Isla ng Boracay.

Sa pahayag ni Malay Councilor Maylynn Graf, chairwoman ng environment committee, layunin ng panukala na makalikom ng karagdagang pondong ilalaan sa mga environmental project sa isla.

Bago ipatupad ang rehabilitasyon ng isla noong Abril 26, aabot lamang sa P75 ang ipinatutupad na environment fee sa lugar.

Sa kanyang privilege speech, plano na nilang singilin ng P20 ang mga residente bilang bayad ng mga ito.

Gayunman, sinabi nito na patuloy pa rin nila itong pinag-aaralan at kokonsultahin din nila ang mga residente hinggil sa usapin.

Matatandaang kinasuhan ni Department of Interior and Local Government (DILG) Undersecretary Epimaco Densing ang ilang opisyal ng Malay, kasama ang mga miyembro ng konseho, dahil nagkaroon umano ng iregularidad sa paggamit ng environment fee na itinanggi naman ng Sangguniang Bayan.