25 kargamento naglaho sa container terminal

Isa na namang ilegal na operasyon sa Bureau of Customs (BoC) ang nadiskubre kamakailan at hinihinalang malaki gaya ng “tara” system, ayon kay Customs Commissioner Isidro Lapeña.

Nasa 25 kargamento ang nadiskubreng ilegal na inalis mula sa container yard ng Mindanao Container Terminal sa Tagaloan, Misamis Oriental noong Hunyo at Hulyo.

Ganito rin ang nangyari sa Maynila nitong Mayo, kung kailan nasa 105 container vans ng tiles ang nakalusot sa mga opisyal sa Port of Manila.

Hinarap ni Lapeña ang mga mamamahayag matapos ang Port User’s Summit sa Maynila nitong Biyernes, at sinabi na habang ang tanggapan ay “busy putting up policy reforms, unscrupulous individuals or groups continue to lurk within and around the bureau and are still able to come up with wicked schemes to dupe the government for their selfish interests.”

“This scheme that surfaced is another skeleton in the closet,” ayon sa komisyoner.

Nitong Hunyo 25, ayon kay Lapeña, nakatanggap siya ng impormasyon na mayroong mga kahina- hinalang kargamento sa Mindanao Container Terminal, dahilan upang mag-isyu siya ng alert orders sa iba’t ibang shipment. Nanggaling ang impormasyon mula sa isang sibilyan, aniya.

Noong araw ding iyon, dalawang container vans ng asukal ang idineklarang pre-fabricated steel, at nakapangalan sa JDan Trading, ang inalerto.

Pagsapit ng Hunyo 28, isa pang alert order ang inisyu sa walong container vans ng sibuyas at asukal at ito ay nakapangalan sa Mave Trading and General Success Merchandise. Isasailalim sana ang mga kargamento sa immediate examination, gayunman, nadiskubre na ang walong container ay ilegal na inilabas sa Mindanao International Container Terminal Services, Inc. (MICTSI) noong Hunyo 14, 15 at 17.

Hulyo 3, ayon kay Lapeña, nang muli siyang mag- isyu ng alert order sa 17 container vans na nakapangalan sa Mave Trading, FVV Gracias Enterprises, at Melea RPL Enterprises.

“When MICTSI was asked to prepare the containers for inspection, MICTSI reported that those 17 containers had been released or withdrawn from their container yard on various dates -- June 20, 21, 22, 23, 27, and 28, 2018, even before I ordered them alerted, and much worse even before entries were filed,” pagsisiwalat ni Lapeña.

“Twenty-five containers were illegally withdrawn from the MICTSI yard. Only eight containers were covered by entries and partially processed while the 17 containers were not covered by any entry. This is unacceptable,” pahayag ng komisyoner.