Food aid program para sa 900 pamilya sa Lanao del Sur
bahagi ng pagsisikap na masolusyunan ang problema ng mahihirap na pamilya sa rehiyon, mahigit 900 pamilya sa Lanao del Sur ang nabiyayaan ng dalawang buwang supply ng pagkain at tulong sa nutrisyon mula sa rehiyonal na pamahalaan ng Autonomous Region in Muslim Mindanao’s (ARMM).
Sa pamamagitan ng Bangsamoro Regional Inclusive Development for Growth and Empowerment (ARMM-BRIDGE) “Apat na Dapat” program, sinabi ni ARMM Governor Mujiv Hataman na makapagbibigay ng supplemental na suporta sa pagkain ang rehiyon para sa target na 7,000 pamilyang benepisyaryo sa ARMM ngayong 2018.
Nabanggit ni Hataman na nasa P2.9 bilyong pondo ang inilaan ng pamahalaan ng ARMM para sa programa na layong labanan ang kahirapan at maingat ang kalagayan ng pinakamahihirap na pamilya sa pamamagitan ng pagbibigay ng mga pangunahing pangangailangan, tulad ng pagkain, livelihood training, tubig at sanitasyon, tahanan at kuryente.
Muli niyang inihayag na ang kawalan ng isa sa mga pangunahing pangangailangan ang maaaring magdulot ng panganib sa pamilya.
Ayon kay Hataman, nilalayon ng programa na masiguro na mapapanatili ng mga pamilyang benepisyaryo ang pagkakaroon ng pagkain sa pamamagitan ng tulong pangkabuhayan at pagsasanay at iba pang mapagkakakitaang aktibidad.
Nitong Miyerkules, sabay-sabay na isinagawa ang pamamahagi ng mga pagkain sa mga bayan ng Picong, Balabagan, Madamba, Lumba-Bayabao, Balindong, Saguiaran, Mulondo, Butig, at Ditsaan-Ramain, na kabilang lahat sa probinsiya ng Lanao del Sur.
Habang ngayong darating na linggo naman inaasahanan ang pamamahagi sa mga bayan ng Piagapo, Lumbaca Unayan, Lumbayanague, Bubong Ramain, Kapai, Ganassi, Madalum, Masiu, Kapatagan, at Marawi City ayon sa gobernador.
Bawat isang pamilyang benepisyaryo ay makakatanggap ng dalawang sako ng de-kalidad na bigas, itlog, beans, gatas, mantika, asin, asukal at kape. Kasama naman sa ipamimigay na hygiene kit ang sabon, shampoo, toothpaste at toothbrush sa bawat pamilya.
Idiniin naman ni David Ali, ARMM BRIDGE project manager, na ang kakulangan sa pagkain ay isa sa mga salik kung bakit ikinokonsidera ang ilang pamilya na “poorest of the poor.”
“That is why we are giving food support because this program was designed by our nutritionist for the nutrition requirement needed by each family,” giit ni Ali, na idinagdag na sinusukat rin nila ang timbang at taas ng mga batang benepisyaryo kada buwan.
Bukod sa pamamahagi ng pagkain, nagsagawa rin ng orientation para sa pangunahing nutrisyon kung saan tinuruan ng mga nutritionist at staff ng ARMM-BRIDGE ang mga magulang tamang pangangalaga sa katawan at nutrisyon upang makatulong mabawasan ang banta ng malnutrisyon, lalo na sa mga kabataan.
Sa ngayon, nakapagbahagi na ang ARMM ng food aid sa mga probinsiya ng Maguindanao, Tawi-tawi, at Lanao del Sur. Habang kahalintulad na aktibidad din ang nakatakdang isagawa sa Basilan at Sulu sa mga susunod na buwan.