R27.7- M marijuana, winasak sa Kalinga

LA TRINIDAD, Benguet - Sinalakay ng magkasanib na puwersa ng Kalinga-Drug Enforcement personnel, Provincial and Regional Maneuver Force Battalion at Philippine Drug Enforcement Agency (PDEA)Cordillera ang dalawang barangay na umano’y taniman ng marijuana sa Kalinga, kamakailan.

Sa dalawang araw na operasyon, nadiskubre ng awtoridad ang aabot sa P27, 779,000 halaga ng tanim na marijuana, sa 17 plantasyon sa Barangay Butbut Proper at Loccong, Tinglayan, Kalinga.

Inaalam pa ng awtoridad ang pagkakakilanlan ng may-ari ng plantasyon upang mapanagot sa batas.

Kaugnay nito, inihayag naman ni Police Regional Office-Cordillera director, Chief Supt. Rolando Nana ang pagkakadakip sa apat na drug pushers sa magkakasunod na buybust operations sa rehiyon.

Kinilala ang mga ito na sina Marica Day Rizal Santos, 28, alyas Maricar, ng Scout Barrio, Baguio City, na nadakip sa Centerpoint Plaza, Bakakeng Central, Marcos Highway, Baguio City nang maaktuhang nagbabenta ng P3,500 halaga ng umano’y shabu.

Nasakote rin si Catherine Perez Hieras, 48, chef, ng Pines Park, La Trinidad, Benguet sa Upper Session Road, Baguio City.

Habang sina Davis Polinec Edwas, 39, laborer, ng Upper Rock Quarry, Baguio City; at Marlon Andaway Mahoy, 40, driver, ng Dagupan Centro, Tabuk City ay nadakip sa Slide, Tuding, Itogon, Benguet at sa Mapaway, Ipil, Tabuk City, Kalinga, ayon sa pagkakasunod.