Kapistahan ni Sta. Maria Magdalena sa Pillila
PANAHON ng pagbibigay-buhay sa mga tradisyon na nakaugat na sa kultura ng bayan at mga mamamayan ang pagdiriwang ng mga kapistahan sa mga bayan sa lalawigan, sa mga lungsod at maging sa mga barangay sa Pilipinas. Sa pagdiriwang, nakikita ang pagpapahalaga sa pamanang tradisyon ng kanilang ninuno. At ang pagdiriwang ng kapistahan ay panahon ng pasasalamat sa mga Poong Maykapal sa mga biyayang natanggap at sa patnubay ng kanilang patron o patrona.
Mababanggit na halimbawa ang Pillilla, ang pang-apat na pinakamalaking bayan sa Rizal. Ngayong ika-22 ng Hulyo, ay ipinagdiriwang ng mamamayan ang kapistahan ni Sta. Maria Magdalena, ang Ina at Patrona ng Pililla. Ang pagdiriwang na ito ang ika-435 taon ng kapistahan. Ang tema ay “STA MARIA MAGDALENA: Matapat na Alagad na Mapagpakumbabang Sumunod kay Kristo”.
May iba’t ibang gawain ang inilunsad ng Parokya ni Sta. Maria Magdalena bago sumapit ang araw ng kapistahan, sa pangunguna ng kanilang parish priest na si Fr. Alfredo Meneses. Sinimulan ang nobenamesa para kay Sta. Maria Magdalena tuwing ikaanim ng gabi sa simbahan ng Pililla, na dambana ni Sta. Maria Magdalena. Nag-umpisa nitong Hulyo 13-Hulyo 21. Sa nobena, binabasa ang DALIT kay Sta.Maria Magdalena. Ganito ang bahagi ng Dalit: “ANG BUHAY MONG MAPAGPASAKIT, IBABANTOG KO ANG PAG-IBIG. O MAGDALENA AMING KASI, SA DIYOS IDALANGIN MO KAMI.”
Naging bahagi rin ang pagbabasbas ng Altar ng Simbahan ng Pililla. Isang concelebrated mass ang ginanap na pinangunahan ni Bishop Francisco de Leon, ng Diosesis ng Antipolo. Kasama sa concelebrated mass si Fr. Reynante Tolentino, naging parish priest ng Parokya ni Sta. Maria Magdalena.
Ang unang simbahan ng Pililla na yari sa kawayan at kogon ay ipinagawa ng mga paring Franciscano noong 1583, ngunit ito ay nasunog. Sinimulan naman itayo ang kasalukuyang batong simbahan noong 1670. Natapos ito noong 1673. Maraming pagbabago at pagsasaayos ang ginawa sa simbahan sa paglipas ng panahon hanggang sa kasalukuyan upang maging kaaaya-ayang lugar at tahanan ng Diyos.
At kahapon, Hulyo 21, bisperas ng kapistahan ng Pillila at ni Sta. Maria Magdalena, ipinarada ng mga kabataan ng Pililla ang mga karosa. Nagsimula sa harap ng simbahan ng Pililla at umikot sa kabayanan ng Pililla.
Ngayong ika-22 ng Hulyo, araw ng kapistahan ni Sta. Maria, tampok ang misa sa ganap na 5:00 ng umaga. Kasunod nito ang prusisyon ng imahen ni Sta. Maria Magdalena na lalahukan ng mga kabataan, ang iba’t ibang religious organization at ang mga deboto at may panata kay Sta. Maria Magdalena. Matapos ang prusisyon, ganap na 9:00 ng umaga, tampok ang concelebrated mass na alay kay Sta Maria Magdalena. Pangungunahan ito ni Bishop Francisco de Leon, ng Diosesis ng Antipolo.
Sa pagdiriwang ng kapistahan ni Sta Maria Magdalena at ng Pililla, bahagi rin ang parada ng siyam na banda ng musiko (brass), kasama ang kanilang mga majoerette, sa umaga ng ika-23 ng Hulyo. Kasunod nito sa hapon ang band at majorette competition.
Ayon kay San Lukas (Lk,8:2) si Sta. Maria Magdalena ay isa sa mga babae na kasama ni Hesus at ng mga apostol habang sila ay nangangaral ng Kaharian ng Diyos mula sa Galilea hanggang Jerusalem. Gamit ang kanilang sariling yaman, tinulungan nila si Hesus sa kanilang mga pangangailangan. Siya ang tintukoy ni San Lukas at San Marcos sa kanilang ebanghelyo na inalisan ng pitong demonyo. Niliwanag na ng Simbahan na ang pitong demonyo na inalis sa kanya ay hindi nangangahulugan ng kasalanan ng laman o pagiging babaeng bayaran. Ang totoo, tulad ng ibang inalihan ng masamang Espiritu, si Sta. Maria Magdalena ay ginawan din ng eksorsismo ni Hesus upang maging malinis at magkaroon ng bagong buhay.
Mula noon, siya ay sumunod at naglingkod kay Hesus. Naging saksi si Sta Maria Magdalena sa pangangaral, mga himala’t pagpapagaling, pagpapasan ng krus, pagpapako at pagkamatay ni Hesus sa krus hanggang sa libingan. Kaya naman ang pinakamalaking biyaya at pagpapala niya ay sa kanya unang nagpakita si Hesus matapos na muling nabuhay (Jn.20:11-18). Sa kanya ipinagkatiwala ni Hesus ang Mabuting Balita ng muling pagkabuhay para ipahayag sa mga apostoles.