Mr. Universe Tourism, umaming may anak
SAunang pagkakataon ay ibinunyag ni reigning Mister Universe Tourism Ion Perez, sa isang ekslusibong panayam, na mayroon siyang anak.
“Mayroong 3-year-old na anak po akong lalaki,” isiniwalat ni Perez upang kumpirmahin ang mga usap- usapan na mayroon nga siyang anak, nang makapanayam sa paglulunsad ng Bayongciaga products sa Studio A sa Quezon City, nitong Sabado.
Ang Bayongciaga ang unang endorsement ni Perez mula nang magwagi siya sa international male pageant, dalawang buwan na ang nakalipas. Kasama ni Perez sa endorsement ang reigning Miss Philippines Youth na si Nadine Bornilla. Ang bag company ay pagmamay-ari ni
Javier Villarfuel at Jov Ravago. Sinabi rin ni Perez, 27, na namamalagi ang kanyang anak kasama ng ina nito.
“Nakikita ko lamang ang anak ko kapag hinihiram ko siya sa mama niya. Nangyari po ‘yun dala na rin ng pagiging mapusok ko noon,” lahad ng male model.
Ngunit binanggit din niyang isa siyang responsableng ama. “Hindi man kami nagkikita madalas pero hindi ko talaga pinapabayaan ang anak ko”.
Nang tanungin kung nais niyang sumali rin ang anak sa mga male pageant sa hinaharap, sabi ni Perez: “Nasa sa kanya po iyon. Sana maging proud siya sa mga achievements ko sa pageant. Makikita naman niya ang pinag-mulan ko pag nagka- isip na siya”. Inihayag ni Dr. Jumel
Bornilla, Presidente ng Mister Universe Tourism pageant, na nalaman na lamang ng organisasyon ang tungkol sa pagkakaroon ng anak ni Ion pagkatapos ng timpalak.
“We’ve discussed it. But who are we to judge?” ani Bornilla.
Aniya pa, hindi umano nila tatanggalin kay Bornilla ang karangalan dahil ginagawa naman niya ang kanyang mga tungkulin sa Mister Universe Tourism.
Unang nakilala si Perez nang magwagi ito sa Misters of Filipinas 2017, na siyang naging daan para makasali siya sa Mister Universe Tourism 2018. Ang parehas na pageant ay para lamang sa mga single na lalaki.
Inilahad din ni Perez na maayos ang samahan niya at ng Prime Events Productions Philippines Foundation, Inc. (PEPPS), ang organizer ng Misters of Filipinas contest.
“Dapat pupunta po ako sa Man of the World contest noon kaso nag-conflict po talaga ang schedule ko. Nag -sorry naman po ako sa kanila,” sabi ni Perez.
Nangako naman si Perez na magtatapos sa pag-aaral pagkatapos ng kanyang reign bilang Mister Universe Tourism. “Gusto ko po talagang makatapos ng pag-aaral. Hindi ko pa alam kung sa Maynila o babalik uli ako sa Tarlac para sa aking pag-aaral”.