Solusyon vs inflation, ikinakasa
Determinado ang Malacañang na maglatag ng iba’t ibang solusyon para maresolba ang nararasang inflation sa bansa.
Kabilang sa mga hakbang na tinukoy ni Presidential Spokesperson Harry Roque ay ang paglutas sa problema sa kahirapan, pagsusulong ng rice ratification at pagpapatupad ng “Build, Build, Build” program upang mapababa na rin ang transportation cost ng mga bilihin.
Inilabas ni Roque ang reaksiyon bilang tugon sa resulta ng isinagawang survey ng Social Weather Stations (SWS) noong Hunyo 27-30, kung saan 48 porsiyento ng mga pamilyang Pinoy o 11.1 milyong pamilya ang ipinapalagay na sila ay mahirap.
Mas mataas ito ng anim na puntos kumpara sa 42 porsiyento o 9.8 milyong pamilya mula sa nakalipas na tatlong buwan at pinakamataas mula noong naitala ang 50% nito noong unang tatlong buwan ng 2017.
Sineseryoso, aniya, ng Malacañang ang resulta ng survey at iginiit na may mga bagay na nakaapekto sa development na ito.
Nang ianunsyo, aniya, ang inflation rate noong Hunyo ay nakaramdam ng pagtaas sa presyo sa mga bilihin, partikular na sa presyo ng bigas, sa panahong isinagawa ang survey dahil na rin sa pagkaantala ng supply nito bunsod ng masamang lagay ng panahon.
Sa panahong tinukoy sa survey, naipamahagi na ng Department of Social Welfare and Development (DSWD) ang unconditional cash transfers (UCT) sa humigit-kumulang 3.8 milyong benepisyaryo nito.