Mapanganib ngayong tag-ulan ang minahan sa Zambales
MARAHILkagaya ko rin kayong nakatanggap ng mga ALERT text message mula sa National Disaster Risk Reduction and Management Council (NDRRMC) at Philippine Atmospheric Geophysical and Astronomical Services Administration ( PAGASA) nitong nakaraang araw na walang humpay ang pagbuhos ng ulan.
Ang mga text message ay nagbibigay ng WARNING sa mga mamamayan na mag-ingat sa BAHA at mga LAND SLIDE na maaaring maganap dahil sa magiging malakas ang buhos ng ulan, na nahigop papasok sa bansa ng isa na namang namumuong bagyo na namataan ng PAGASA na patungo sa Pilipinas.
Madalas nababalewala lang ang mga mensaheng ganito, lalo pa nga’t patungkol din lamang ito sa sinasabing LANDSLIDE o mga pagguho ng lupa sa mga tinitirahang lugar – wala naman kasing malala na mga landslide dito sa Metro Manila na dapat din nating katakutan!
Ngunit hindi para sa mga tagaZambales --- na sa tuwing makararamdam ng malakas na pagbuhos ng ulan, ay labis na nangangamba sa panganib at sakuna na maaaring idulot ng mga abandonadong minahan sa kanilang lugar.
Sa text message na ipinadala sa ImbestigaDAVE ng mga naninirahan sa Candelaria, nangangamba raw sila sa parati na lamang na nakaambang panganib na maaaring idulot ng malakas na buhos ng ulan sa mga abandonadong minahan ng Nickel Ore sa kanilang lugar: “Sir, tulungan n’yo po kami dito sa Candelaria sa Zambales. ‘Yong mga nickel ore na iniwan ng small scale mining firms baka dumausdos papunta sa bukid at ilog dito sa aming lugar dahil sa sunud-sunod na pag-ulan.”
Ang mensaheng ito ng “texter” ay muling nagpasariwa sa aking alaala, hinggil sa paglapit at pagrereklamo ng isang grupo ng mga magsasakang tagaZambales din, na nagsampa noon ng kaso laban sa isang opisyal ng Mines and Geosciences Bureau (MGB).
Ang inirereklamo ng mga magsasaka ay isang nagngangalang Danilo Uykieng, na ayon sa mga magsasaka, ay isang opisyal sa MGB, na kanilang itinuturong dahilan kung bakit hindi naialis o nalinis ang mga abandonadong nickel ore sa mga minahang ito sa Zambales.
Magugunita na itong si Uykieng ay may kaso ng pang-aabuso sa mamamayan ng Zambales dahil sa pakikipagsabuwatan nito sa malalaking kumpanya ng minahan.
Si Uykieng ay pinasususpinde at pinakakasuhan ng mga environmentalists at residente ng Sta. Cruz, Zambales sa tanggapan ng Ombudsman dahil sa alegasyon ng kurapsyon, nang payagan niya ang ilegal na pagmimina at sirain ang kalikasan kapalit ng malaking halaga.
Nahaharap si Uykieng sa kasong graft matapos siyang ireklamo ng mga magsasaka ng Sta. Cruz dahil sa pagpabor niya umano sa mga pribadong minahan noong siya ang MGB Region 3 director mula 2011 hanggang 2015.
Ipinagdidiinan ng mga nagrereklamo na dahil si Pangulong Duterte raw mismo ang nagsasabing hindi katanggap-tanggap sa kanyang administrasyon ang ganitong klase ng mga empleyado ng gobyerno – dapat sa kanyang pagharap sa mga mamamayan ngayong Lunes, Hulyo 23, para sa kanyang ikatlong SONA, ay makarating na sa Pangulo ang hinaing nilang mga taga-Zambales at maaksyunan ang kanilang reklamo para naman tuluyan nang maparusahan ang mga taong gobyerno na sangkot sa pagsira sa ating kalikasan!
Mag- text at tumawag sa Globe: 09369953459 o mag-email sa: daveridiano@ yahoo.com