SONA ng Pangulo, taunang ritwal sa Kongreso

SAkasaysayan ng iniibig nating Pilipinas, kapag sumasapit ang ikaapat na Lunes ng Hulyo ay ginaganap ang State of the Nation Address (SONA) ng Pangulo ng Pilipinas sa isang joint session sa Kongreso. Ang SONA ay itinuturing na isang natatanging pangyayari at bahagi ng political history ng ating bansa. Isang mahalaga at taunang ritwal sa Kongreso na inilalahad ng Pangulo ang tunay na kalagayan ng bansa.

Sa mga nakalipas na SONA ng bawat naging Pangulo ng Pilipinas, tinampukan ng pag- uulat ng mga accomplishment o nagawa ng Pangulo sa ating bayan. Tumutukoy sa iba’t ibang antas ng paglilingkod sa sambayanan. Sa ekonomiya o kabuhayan, edukasyon, kalusugan, pagsasaka, impra project, pabahay, food security, patubig sa programang pansakahan, enerhiya, farm to market road at iba pang antas ng serbisyo na mga mamamayan ang nakikinabang.

Ang SONA ay isa ring magandang pagkakataon na ilahad ng Pangulo ang kanyang mga bibigyang prioridad at gagawing mga reporma na aaksiyunan ng mga miyembro ng Kongreso sa pamamagitan ng pagpapatibay sa mga panukalang-batas na kaugnay sa hangarin ng Pangulo.

Kapag SONA, mapapansin na ang mga miyembro ng dalawang Kapulungan ay nagpapatahi ng kanilang magagarang kasuotan. Barong Tagalog o Amerikana. Talagang kagalang-galang silang tingnan sa suot nilang mamahaling Barong at Amerikana. Ang mga babaeng miyembro ng Kongreso ay nagpapatahi rin ng kanilang magagandang gown. Nagsusuot ng mga alahas at iba pang borloloy sa katawan. Nasasabi tuloy ng ibang mapanuri, sila’y parang nasa isang fashion show.

Maging ang Pangulo ng Pilipinas ay nagpapatahi rin ng maganda o simpleng Barong Tagalog. At ngayong ikatlong SONA ni Pangulong Duterte, ang miyembro ng kanyang pamilya ay nagpatahi rin ng magandang gown tulad ni Davao City Mayor Sarah Duterte Carpio. Kulay asul ang kanyang gown. Ang dating maybahay ng Pangulo ay nagpatahi rin ng kanyang gown.

Ang SONA ay dinadaluhan din ng mga dating Pangulo ng Pilipinas, ng mga cabinet member ng Pangulo, alagad ng Simbahan, mga foreign dignitary at iba pang mga panauhin. Sila’y makikiisa sa pagbibigay ng malakas, matunog o pakunwaring palakpak sa mga sinasabi ng Pangulo. May katotohanan o pambibilog man ng ulo.

Kapag SONA ng Pangulo, nagsasagawa ng kilos-protesta ang iba’t ibang militanteng grupo. Tulad ngayong 2018, ang grupo ng Bayan Muna ay naglunsad ng “Lakbayan” na nagsimula sa Calamba City. Dala nila ang effigy ng Pangulong Duterte na tinawag nilang “Dutertemonyo” na kanilang susunugin sa gagawin nilang programa sa may Commonwealth Avenue.

At para naman sa pangangalaga ng kaayusan at katahimikan ng ikatlong SONA ng Pangulong Duterte, may 6,000 mga pulis ang ide-deploy ng Philippine National Police (PNP) sa Batasang Road at Commonwealth Avenue at paligid ng Kongreso. Ang Armed Forces of the Philippines (AFP), bilang augmentation ay may ide-deploy na 1,000 mga sundalo. Sa nasabing bilang ng mga pulis at sundalo, sabi nga ng iba nating kababayan: Parang war zone ang dalawang lugar na malapit sa Kongreso .

Sa ikatlong SONA ng Pangulong Duterte, ayon sa kanyang special assistant na si Bong Go, may anim na pahina lamang ang nilalaman ng SONA ng Presidente. Humaba man ito ay dahil sa adlib ng Pangulo na karaniwang ginagawa kapag nagtatalumpati.

At palibhasa’y ang slogan ng Pangulo ay “Change is coming”, maghihintay ang sambayanang Pilipino sa mga ilalahad ng Pangulong Duterte sa kanyang ikatlong SONA. Sa mga pagbabago. Kasama na kaya rito ang mga programa sa pag-unlad ng bansa, lunas sa kahirapan, solusyon sa patuloy na pagtaas ng mga bilihin at kriminalidad?