Guidelines pa-Kuwait ‘di pa rin naipatutupad

Wala pa ring deployment ng domestic workers patungong Kuwait simula nang alisin ang ban dalawang buwan na ang nakalipas, at libu-libong aplikante ang naghihintay na makaalis.

Sinabi ni labor migration expert Manny Geslani na halos 5,000 overseas Filipino workers ang umaalis araw-araw padaan sa NAIA terminals sa Pasay para magtrabaho sa ibang bansa, at karamihan ay re-hires o pabalik sa kanilang mga kontrata sa parehong employers.

Gayunman, sa kabila ng pagbawi ni Pangulong Rodrigo Duterte sa total ban ng OFWs sa Kuwait noong Mayo 16, 2018, wala pang household service workers ang naipadala sa Kuwait dahil ang implementing guidelines na inilabas noong Hulyo 19, 2018 ay hindi pa rin enforceable mula sa Philippine Overseas Employment Administration na mamamahala sa mga patakaran para sa pagpapadala ng HSWs sa Kuwait.

Lumagda ang Kuwait at Pilipinas ng Memorandum of Understanding sa Kuwait noong Mayo 12, 2018 para sa mga hakbang na magpapabuti sa kondisyon ng OFWs sa nasabing Gulf state.

Kasunod nito ay ipinag-utos ni Duterte ang pagalis sa “total lifting” para sa lahat ng manggagawa sa Kuwait. Gayunman, 60 araw na ang nakalipas ay naghihintay pa rin ang private sector na maipatupad ang guidelines makaraan ang publikasyon 15 araw mula sa petsang nilagdaan ni POEA Administrator Bernard Olalia para sa mga bagong patakaran na naglalatag ng mga probisyon ng MOU sa kontrata ng HSWs na napagkasunduan ng Pilipinas at Kuwait.

Libu-libong aplikante na ni-recruit ng private recruitment agencies patungong Kuwait ang naghihintay na maipatupad na ng POEA ang guidelines para sila ay makaalis na.