Pro sa Batasan, Anti sa Commonwealth
Ipinasya ng mga miyembro ng iba’t ibang cause-oriented group na magsagawa ng kanilang protesta sa Commonwealth Avenue, malapit sa St. Peter’s Parish, kaysa malapit sa Batasang Pambansa Complex, kung saan idinaos kahapon ang State- of- the- Nation Address (SONA) ni Pangulong Duterte.
Ayon kay Renato Reyes, secretary general ng Bagong Alyansang Makabayan (BAYAN), mas mabuti kung isagawa nila ang kanilang programa sa malaking lugar na bahagi ng Commonwealth Avenue.
Nanindigan din siya na hindi na nila haharapin pa si Pangulong Duterte pagkatapos ng rally, gaya noong nakaraang taon.
“Mainam na po, hindi magkita at magtagpo ngayon dahil magkaiba po ang tindigan natin sa mga usapin at isyu,” paliwanag nito.
Matatandaang noong nakaraang taon ay hinarap ng Pangulo ang libu-libong raliyista pagkatapos ng kanyang SONA, at tinawag pa nga ito ng pulisya na “security nightmare”.
Ipinaubaya na lamang, aniya, nila sa pro-admin supporters ang Batasang Pambansa Complex.
Bukod sa krisis sa ekonomiya, iginiit din ng grupo sa kanilang programa kahapon ang mga usaping kinakaharap ng mga Pinoy, na kinabibilangan ng political repression, ang nabulilyasong peace talks sa mga komunista, ang Charter change, ang banta ng diktadurya, extrajudicial killings at iba pang paglabag sa karapatang-pantao.
Dakong 12: 00 ng tanghali nang inilabas ng grupo ang kanilang effigy na tinawag nilang “DuterTRAIN, Sagasa sa Mamamayan” na sumasalamin sa kasalukuyang sitwasyon ng bansa.