Kalikasan, nagmaktol, nagsungit
KAPAG ang kalikasan ang nagmaktol o nagsungit, walang kapangyarihan sa mundong ito na taglay ng tao ang makapagpapahupa upang ang kanyang pagmamaktol o pagsusungit ay mapayapa. Ganito ang nangyari nang ilang araw na bumuhos ang malakas ulan na nagdulot ng pagbaha at paglubog sa tubig ng maraming parte ng Pilipinas, kabilang ang Metro Manila.
Milyun-milyong piso o baka bilyun-bilyong piso ang pininsala ng mga pagbaha na dulot ng bagyong Henry na sinundan pa ng bagyong Josie. Dahil dito, sinuspinde ang klase sa mga paaralan sa iba’t ibang bahagi ng bansa.
Sa ulat, sinasabing pito ang namatay at lima pa ang nawawala habang patuloy ang pag- ulan sa Luzon. Posibleng lumaki pa ang bilang ng biktima kapag nakuha na ang lahat ng report. Maraming tanim na palay sa Luzon ang nalubog sa tubig kung kaya maaaring humina ang produksiyon ng mga magsasaka.
Pinabulaanan ng kilusang komunista sa Pilipinas na may malubhang sakit si Jose Ma. Sison, founding chairman ng Communist Party of the Philippines (CPP). Inakusahan ni Fidel Agcaoili, peace panel chairman ng National Democratic Front ( NDF), na si National Security Adviser Hermogenez Esperon ay isang “active purveyor” ng fake news at isa ring sinungaling (pathological liar). Siya ang nagkakalat na may sakit si Joma.
“Magaling si Professor Sison at ganap na naka-recover sa kanyang arthritis noong isang taon. Siya ay masigla at nagsasagawa ng mga panayam dito at sa iba pang lugar sa mga journalist, student scholars, academics at foreign solidarity friends, “ayon kay Agcaoili. Dagdag pa niya: “His mind remains sharp as ever and his analysis of political situations as incisive, brilliant and comprehensive as before.”
Talagang ayaw ni Christopher Lawrence Go, a.k.a Bong Go, na pumalaot sa pulitika at tumakbo sa pagka-senador sa 2019 midterm elections. Pinakiusapan niya ang mga supporter na tanggalin ang billboards at tarpaulins na humihimok sa kanyang tumakbo. Sa mass oath-taking ng mahigit sa 2,000 opisyal ng barangay bilang mga kasapi ng Hugpong ng Pagbabago Party sa Pantukan, Compostela Valley, sinabi niya na mas gusto niyang manatili bilang isang trusted aide ng Pangulong Rodrigo Roa Duterte.
Tapos na ang State of the Nation Address ( SONA) ni PRRD. Tiyak na may pupuri rito at tiyak ding may babatikos. Mga kababayan, ano sa palagay ninyo? Naging makatotohanan ba ang kanyang SONA? Isang araw bago ang SONA, nag-isyu ang mga pinuno ng Simbahang Katoliko na nananawagan sa Pangulo na dapat niyang ipakita at ihayag ang tunay na sitwasyon sa bansa.