IBF title, binitiwan ng Hapones makaiwas lang kay Barriga

SAhalip harapin si mandatory contender Mark Anthony Barriga ng Pilipinas, inihayag ni IBF minimumweight champion Hiroto Kyoguchi ng Japan na aangat siya ng timbang at lalaban sa light flyweight division.

Nakatakda namang ihayag ng IBF kung sino ang haharapin ni Barriga kina No. 3 contender Carlos Licona at No. 4 Tsubasa Koura ng Japan para sa nabakanteng titulo.

Huling lumaban si Kyoguchi nang talunin sa puntos si Filipino Vince Paras nong nakaraang Mayo 20 sa Tokyo, Japan para mapaganda ang kanyang rekord sa perpektong 10 panalo, 7 sa pamamagitan ng knockouts.

“He is 24 yrs old and his body is getting bigger. I was shocked he was about to [cramp up] in the Paras fight. It was due to dehydration,“sabi ng trainer ni Kyoguchi na si Takashi Inoue sa BoxingScene.com.

Puwedeng labanan ni Barriga para sa IBF title ang tubong Mexico na si Licona na kasalukuyang WBO Latino minimumweight champion at may kartadang perpektong 13 panalo, 2 lamang sa knockouts.

Maaari ring piliin ng IBF si Koura na kasalukuyang OPBF minimumweight champion at may rekord na perpektong 13 panalo, 9 sa pamamagitan ng knockouts.

Naging mandatory contender si Barriga nang talunin sa puntos si dating 5th ranked Gabriel Mendoza ng Colombia noong nakaraang Mayo 13 sa SM City North EDSA Skydome para mapaganda ang kanyang rekord sa perpektong 9 na panalo na may 1 pagwawagi lamang sa knockout.