Moira, JK, at Maymay, nanguna sa MOR Pinoy Music Awards
NAIUWI nina Moira dela Torre, JK Labajo at Maymay Entrata ang tatlo sa pinaka-inabangang awards sa MOR Pinoy Music Awards 2018 na ginanap sa Araneta Coliseum nitong Sabado.
Napanalunan ni JK, na kilala na rin ngayon sa pangalang
Juan Karlos, ang Album of the Year para sa JKL, pati na ang OPM Revival of the Year para sa Beautiful Girl.
Wagi naman si Maymay ng Song of the Year para sa single niyang Shanawa at nagpasalamat sa pamamagitan ng isang video message.
Kinilala rin si Moira bilang Female Artist of the Year.
Samantala, iginawad naman ng MOR 101.9 ang prestihiyosong OPM Lifetime Achievement award sa batikang songwriter na si Vehnee Saturno para sa kanyang natatanging kontribusyon sa OPM sa loob ng 38 taon.
Siya ang sumulat ng ilan sa pinakasikat na mga awiting tumatak sa puso ng mga Pilipino, gaya ng Dahil Tanging Ikaw, Bakit Pa Ba, Bakit Pa, Sana Kahit Minsan, ‘ Til My Heartaches End, at Forever’s Not Enough. Nagsama-sama naman sina Jaya, Daryl Ong, Jessa Zaragoza, Bugoy Drilon, at Erik Santos para sa performance ng mga naturang awitin bilang pagpupugay kay Vehnee.
Pinangalanan namang Digital Artist of the Year ang rap at hiphop group na Ex Battalion, ang unang artist na nagwagi sa naturang kategorya na inilunsad ng FM radio station upang kilalanin ang papel ng social media at online digital outlets sa pagtataguyod ng OPM.
Panalo rin bilang Male Artist of the Year si Iñigo Pascual, habang ang ka-love team niyang si Maris
Racal naman ang itinanghal na Best New Artist ngayong taon.
Nakuha naman ni Jona at ng Boyband PH ang Best Collaboration of the Year award para sa kanilang awiting Til the End of Time, habang LSS of the Year naman ang napanalunan ng TNT Records singer na si Noven Belleza para sa Tumahan Ka Na.
Wagi naman ng Regional Song of the Year ang awiting Cebuana ni Karencitta, at inuwi naman ng Cherifer ang Kantamercial of the Year award.
Layunin ng MOR Pinoy Music Awards na bigyang-pugay ang pinakamahuhusay sa larangan ng OPM sa bansa batay mismo sa pinagsamasamang boto ng mga tagapakinig sa radyo, MOR Awards Committee, OPM Board members, at piling OPM artists.
Nagsanib-puwersa rin ang 17 istasyon ng MOR sa buong bansa para sa One Pinas, One MOR, na maghahatid sa mga tagapakinig sa Luzon, Visayas, at Mindanao ng iisang tunog at iisang vibe.