Mayors na ‘di agad magsususpinde, kakasuhan
Pinaalalahanan ng Department of Interior and Local Government (DILG) ang mga lokal na pamahalaan na maging maagap sa pagdedeklara ng kanselasyon ng klase at trabaho tuwing masama ang panahon, at nagbantang papatawan ng disciplinary action ang mga opisyal na hindi maghahayag ng suspensiyon sa tamang oras.
“Local chief executives should always be on top of the situation, especially during typhoons and calamities. They should be actively monitoring the weather condition and the actual situation in their localities. Hindi puwedeng tutulug-tulog,” sabi ni DILG Officer-in-Charge Secretary Eduardo Año.
Ito ang inihayag ng kalihim kasunod ng mga reklamong natanggap ng DILG mula sa publiko kaugnay ng huli nang pagsususpinde ng klase ng ilang lokal na opisyal nang salantain ng bagyong ‘Henry’ ang Luzon noong nakaraang linggo.
Ayon kay Año, bilang mga lokal na opisyal at pinuno ng kani-kanilang local disaster risk reduction and management council, dapat na maging alerto ang mga opisyal at agarang magpasya batay sa sitwasyon ng panahon sa kanilang lugar kung sususpendihin ba o hindi ang klase sa paaralan.
“By the time the announcements were made, the students were already in school and had to tread through gutter and knee levels of unsanitary flood water to go back home,” paliwanag ni Año.
Nagbanta rin si Año na pinagaaralan na ng DILG ang pagpapataw ng disciplinary actions laban sa mga tatamad-tamad na opisyal na hindi kaagad nagsususpinde ng klase, dahil malinaw na pagpapabaya ito sa tungkulin.
“Erring officials who are too lazy to wake up to suspend classes even though PAGASA has declared its warning signals may be charged with gross neglect of duty,” anang kalihim.
Aniya, kung huli ang pagsuspinde sa klase ay nalalagay sa panganib ang kaligtasan ng mga estudyanteng kakailanganing lumusong sa baha at sumagasa sa malakas na ulan upang makauwi.
“We are putting minors at risk when we delay class suspensions. We must not wait for the flood levels to become critical before making the announcements,” aniya.