Grandmaster Sexay ng WWE, patay na
PUMANAW na ang dating WWE star na si Brian Christopher Lawler, sa edad na 46. Si Brian, na pumasok sa mundo ng wrestling gamit ang pangalang Grandmaster Sexay, at anak ng WWE Hall of Famer na si Jerry “The King” Lawler.
Kinumpirma ng WWE organization ang balita ng pagpanaw ni Brian sa website nito, at nagpaabot ng pakikiramay sa mga naulila ng wrestler.
Binawian ng buhay si Brian nitong Linggo makaraang isailalim sa life support nitong Sabado ng gabi, nang nagtangka siyang magpakamatay habang nasa kulungan sa Memphis, Tennessee, ulat ng TMZ. Matatandaang inaresto si Brian ngayong buwan dahil sa pagmamaneho nang lasing at pagtakas sa mga awtoridad.
Kapiling umano ni Brian ang kanyang pamilya, kabilang ang kanyang ama, nang bawian siya ng buhay.
Sa kanyang panahon sa WWE, kabilang ang yumaong wrestler sa tag team na Too Cool kasama si Scott “Scotty 2 Hotty”
Garland. Nagsimula ang kanyang career noong late ‘80s bilang bahagi ng United States Wrestling Association bago sumali sa WWE (dating WWF) noong 1997.
Sa loob ng kanyang 25 taong career, lumaban si Brian sa ilalim ng iba’t ibang organisasyon, gaya ng Total Nonstop Action Wrestling at ilang independent wrestling promotion groups, ngunit ilang beses din siyang bumalik sa WWE. Pebrero 2014 nang huli siyang napanood sa WWE.
Nagpahayag naman ng pakikiramay ang marami, kabilang ang mga kapwa niya wrestler at dating promotional organizations, sa Twitter sa pagpanaw ni Brian, ulat ng Entertainment Tonight.