Ex-NegOr solon kinasuhan sa pork scam
Ipinagharap ng kasong graft at malversation sa Sandiganbayan si dating Negros Oriental 3rd District Rep. Herminio Guivelondo Teves kaugnay ng pagkakasangkot umano nito sa P10 milyong pork barrel fund scam noong 2007.
Bukod kay Teves, sinampahan din ng kahalintulad na kaso ang dati nitong chief of staff na si Hiram Pulido, dating Technology Livelihood and Resource Center (TLRC) director general Antonio Ortiz, dating deputy director General Dennis Cunanan, dating Department Manager III Francisco Figura, dating Chief Accountant Marivic Jover, at dating Supervisor Belina Agbayani Concepcion.
Kasama rin sa kaso si Samuel Bombero, Sr., presdiente ng Molugan Foundation Incorporated (MFI), ang non-government organization (NGO) na sangkot sa anomalya.
Nag-ugat ang kaso nang ilaan ni Teves sa NGO ni Bombero ang P9.6 milyong bahagi ng kanyang priority development assistance fund (PDAF), sa pamamagitan umano ng pakikipagsabwatan sa mga ito noong Pebrero 27, 2007. Mismong si Bombero ang tumanggap sa nasabing pondo.
Nakatanggap naman ng P400,000 ang TLRC bilang service fee nito.
Gayunman, hindi umano sinunod ng mga ito ang Approriation Law at Republic Act 9184 (Government Procurement Reform Act) at ang implementing rules and regulations nito.
Natuklasan ding hindi accredited at hindi kuwalipikado ang MFI na hawakan ang proyekto.
Itinakda na ng anti-graft court ang P70,000 piyansa sa bawat akusado.