10 drug suspects nalambat sa buy-bust
Sampung drug suspect ang inaresto ng Makati City Police sa magkakasunod na buy-bust operations sa lungsod, kamakalawa.
Unang nagkasa ng buy-bust operation ang mga tauhan ng Station Drug Enforcement Unit (SDEU) at Police Community Precinct (PCP) 1, sa pangunguna nina Insp. Jeson Vigilla at Senior Insp. Maupay, na ikinaaresto ng pitong katao sa isang bahay sa F. Nazario Street, Barangay Singkamas sa Makati City, bandang 3:10 ng hapon.
Kabilang sa mga inaresto sina Mary Grace Manlait, 19; Ma. Theresa Bantayan y Atlawan, alyas Tere, 35; Mark Anthony Dizon y Castro, alyas Mac Mac, 24; Danilo Cruz y Brizuela, alyas Danny, 55; Jay-ar Dizon y Castro, alyas Aputi, 32; Romejun Diyon y Macatual, alyas Romejo, 26, at Kenneth Dizon, nasa hustong gulang, pawang nakatira sa Bgy. Singkamas.
Nasamsam sa pitong suspek ang P300 buy-bust money, 14 na pakete ng umano’y shabu, isang timbangan; isang cell phone; apat na bala; at isang metal case.
Arestado naman sa paglabag sa Obstruction of Justice ang isang Ulysses Tejada y Quijano, 44, ng Solchuaga St., Bgy. Singkamas, matapos umanong makialam at pigilan ang awtoridad sa naturang operasyon.
Sa imbestigasyon, isiniwalat ng mga suspek ang pagkakakilanlan ng supplier ng droga kaya nagsagawa ng ikalawang buy-bust operation sa eskinita sa Caimito St., sa Bgy. Cembo, dakong 6:15 ng gabi.
Natimbog sa operasyon ang suspek na si Ben Garcia y Bade, alyas Ben, 46, ng No.143 Caimito St., Bgy. Cembo, at nakumpiska ang P300 buybust money at 15 pakete ng umano’y shabu.
Sa isa pang follow-up at antiillegal drugs operations ng SDEU sa Magsaysay St., Bgy. Guadalupe Nuevo, naaresto ang umano’y magkasabwat na sina Mabella Delgado y Balabis, alyas Mabel, 29; at Jory Palmes y Danoy, alyas Tyra, 29, kapwa ng Bgy. Guadalupe Nuevo, dakong 6:50 ng gabi.
Sinasabing binentahan ng mga suspek ng P300 halaga ng umano’y shabu ang isang pulis na nagsilbing poseur buyer at nahulinan ng limang pakete ng hinihinalang shabu at drug paraphernalia.
Nakatakdang isailalim ang 10 drug suspects sa inquest proceedings para sa paglabag sa Sections 5 at 11 ng RA 9165 (Comprehensive Dangerous Drugs Act of 2002).