Joint exploration ni Digong sa WPS, ‘di labag sa Konstitusyon

Maaaring magsagawa si Pangulong Duterte ng joint exploration kasama ang China sa hinihinalang oil-rich Spratly island chain sa Philippine Sea (WPS), nang hindi lumalabag sa 1987 Constitution.

Ito ay hanggat hawak ng Pilipinas ang malaking bahagi o 60 porsiyentong share para sa joint exploration, habang ang China ay may 405, sa WPS.

Sa isinagawang mga pag-aaral, ang WPS ay kinapapalooban ng bilyun-bilyong barrels ng langis, at isang trilyong barrel ng natural gas, sinabi kahapon ni Sen. Panfilo M. Lacson.

Ang 60-40 capital sharing para sa joint exploration ay “practical” para sa Pilipinas dahil sumusunod ito sa foreign investment provision ng 31-anyos na Charter, paliwanag niya.

Mayroon ding teknolohiya ang China na kinakailangan para sa joint exploration project, dagdag niya.

At hindi isasakripisyo ng Pilipinas ang kapangyarihan nito at sa 60-40 ratio ay hindi lalabag ang Pangulo sa Konstitusyon, diin ni Lacson.

Gayunman, sinabi ni Sen. Risa Hontiveros na maging ang 60-40 joint exploration agreement na ipinahayag ng Department of Foreign Affairs (DFA) ay ilegal dahil ang WPS ay pag-aari ng Pilipinas.

Sa kabilang dako, sinabi ng Chinese leaders na hindi nito isusuko ang kanilang teritoryo kahit kanino.

Sinabi ni Lacson na inaangkin ng China ang isla dahil kailangan nito ng langis at gasoline para mapaunlad ang ekonomiya.

“So, what’s wrong with the 60-40 ratio sharing?” tanong niya.

Ipinagdiinan niya ang 50-50 sharing ay magiging daan upang makasuhan ang Pangulo ng paglabag sa Konstitusyon.

Ayon kay Lacson, praktikal para sa Pilipinas na piliin ang China bilang investment partner.

“Sa akin, how do we uplift the lives of our people, how do we get the needed funds or generate the needed funds for infrastructure and development and enhance the industries. That is what we should look at,” aniya.