DSWD inireklamo sa anomalya sa 4Ps

Ipinasisibak sa puwesto ang mga empleyado ng Department of Social Welfare and Development (DSWD) sa San Roque, Northern Samar kaugnay ng umano’y anomalya sa implementasyon ng Pantawid Pamilyang Pilipino Program (4Ps) sa lalawigan.

Ayon kay San Roque, Northern Samar Mayor Don Abalon, gumawa na siya ng agarang aksiyon kaugnay ng pagkakadiskubre niya sa umano’y pangongolekta ng buwanang butaw at automated teller marchine (ATM) card replacement, ng mga parent-leader na nagsisilbing DSWD field personnel.

Inireklamo na rin, aniya, niya ito sa DSWD ang insidente at itinuro ang Municipal Link (ML) na isa sa nagpahintulot sa nasabing mga transaksiyon.

Aniya, ini-report na niya kay DSWD-8 Director Restituto Macuto ang anomalya at kaagad itong pinaimbestigahan.

Pinahawakan ang imbestigasyon sa mga tauhan ng DSWD na residente ng lalawigan na naglabas ng ulat na “walang nangyayaring” anomalya sa probinsiya.

Gayunman, nagsagawa pa rin ng hiwalay na imbestigasyon si Abalon, na nakabisto rin na inoobliga umano ang mga benepisaryo na magbayad ng P40 para sa ID card.

Nanawagan na rin siya sa iba pang mga alkalde sa lalawigan na subaybayan ang implementasyon ng 4Ps sa kanikanilang lugar.

"While we have no authority to determine who is admitted into the 4Ps program, the mayors must also look into it and determine whether those who are admitted are truly qualified. We also have to constantly follow up each activity conducted by the program implementors,” sabi pa ni Abalon.