SK kagawad tiklo sa R2.15- M ‘shabu’, boga

Nahaharap sa paglabag sa Comprehensive Dangerous Drugs Act (RA 9165) at illegal possession of firearms and ammunition ang isang kagawad ng Sangguniang Kabataan at kasamahan nito, makaraan silang mahuli ng Philippine National Police-Criminal Investigation and Detection Group (PNP-CIDG) sa ikinasang buy-bust operation.

Nadakip dakong 8:30 ng gabi nitong Sabado ang mga suspek sa akto umano ng pagtutulak ng droga sa Pasay City.

Ayon sa CIDG-National Capital Regional Office ( CIDG- NCRO), nakilala ang mga suspek na sina Christian Joshua Leria, 20, kagawad ng Sangguniang Barangay sa Barangay 97, Zone 14; Cedrix Garcia, 24, kalugar ni Leria.

Narekober sa dalawang suspek ang mahigit isang kilo ng hinihinalang shabu at isang .38 caliber revolver.

Sinabi ng CIDG na isang linggo nilang tinutukan ang dalawang suspek matapos silang makatanggap ng impormasyon na sangkot umano sa gun running at drug trafficking ang dalawa.

Ayon sa CIDG-NCRO, nakabili ng .38 caliber revolver ang pulisya mula sa mga suspek sa halagang P8,000, habang ang dalawang pakete ng hinihinalang shabu na tumitimbang ng 1 kilo at 375 gramo at nagkakahalaga ng P5.15 milyon, ay nakuha naman mula sa bag na dala ng mga suspek.

Nakumpiska rin umano sa dalawa ang P2,000 cash at isang timbangan.

Katwiran ni Leria, ipina-deliver lang sa kanya ang nasabing droga, at posible siyang matanggal sa SK sakaling mapatunayang nagkasala.

Nag-iimbestiga na ang CIDG para matukoy ang supplier nina Leria at Garcia.