Pulis na ‘shabu dealer’, utas sa buy-bust
Napatay ng mga tauhan ng anti-scalawags group ng Philippine National Police (PNP) ang isang pulis na umano’y protektor at shabu dealer nang makipagbarilan umano ito sa buy-bust operation sa Infanta, Quezon, kahapon ng umaga.
Kinilala ni Counter Intelligence Task Force (CITF) chief, Senior Supt. Romeo Caramat, Jr., ang nasawi na si PO2 Ian Rey Abitona, nakatalaga sa Infanta police station.
Sa ulat ng PNP-CITF, naganap ang insidente sa Barangay Pilaway ng naturang bayan, bandang 7:45 ng umaga.
Sa imbestigasyon ng Infanta Municipal Police Station, target sa operasyon si Abitona na nakahalata habang isinasagawa ang transaksiyon laban sa kanya.
Ayon sa pulisya, biglang pinaputukan ni Abitona ang mga operatiba na nakigbarilan naman sa kanya.
Matapos ang ilang minutong engkuwentro, bumulagta ang suspek at dead on the spot dahil sa mga tama ng bala sa katawan.
Ayon kay Caramat, bukod sa pagiging drug dealer ay protektor din umano si Abitona ng drug syndicate na nag-o-operate sa Infanta.
Sa record ng pulisya, sinabi ni Caramat na dati nang sinibak si Abitona bilang tauhan ng intel and drug enforcement unit at inilipat bilang desk officer dahil sa pagkakasangkot umano nito sa droga.
Gayunman, natuklasan pa rin ng CITF na patuloy pa rin umano si Abitona sa ilegal na aktibidad kaya nagpasya na ang grupo na hulihin ito na nagresulta sa pagkasawi nito.
Naiulat na gumagamit umano si Abitona ng civilian assets sa pagrerecycle ng shabu.
Si Abitona rin umano ang nasa likod ng mga pagpatay sa ilan nitong drug asset/runner na nabigong magremit ng perang pinagbentahan ng droga.