R12.6- M shabu nasamsam sa buy-bust

Tinatayang aabot sa P12.6 milyong halaga ng hinihinalang shabu ang nasamsam sa anim na drug suspects, kabilang magkapatid, sa hiwalay sa operasyon sa Tondo, Maynila at Caloocan, kahapon ng madaling araw.

Unang napasakamay ng mga tauhan ng Northern Police District Drug Enforcement Unit (NPDDDEU) sina Girlie Lopez, 38; at Leah Carpio, 34, kapwa taga-Tondo, Maynila.

Nagsagawa ng buy-bust operations ang grupo ni Senior Insp. Cecilio Tomas laban sa dalawa, sa loob ng bahay ni Lopez sa Antipolo Street, dakong 2:00 ng madaling araw.

Nag-ugat ang operasyon sa informant na nag-ulat hinggil sa pagkakasangkot ng mga suspek sa illegal drug trade, ayon kay NPD district Chief Supt. Gregorio Lim.

Kilalang tulak ng droga sina Lopez at Carpio, na umano’y nagsusupply sa Caloocan, Malabon, Navotas, at Valenzuela, ayon kay Lim.

Sa gitna ng transaksiyon, isang undercover cop ang inulat na nakabili ng 50 gramo ng umano’y shabu, sa halagang P5,000, mula sa mga suspek.

Ayon sa awtoridad, nakarekober sila ng 19 na pakete ng hinihinalang shabu, na may bigat na 950 gramo at nagkakahalaga ng P6,500,000 mula sa mga suspek.

Makalipas ang isang oras, nagsagawa rin ng buy-bust operation laban sa apat na iba pa na umano’y kasabwat nina Lopez at Garcia.

Kinilala ang mga ito na sina Lowie Lopez, 37; Reynaldo Lusterio, 30; at magkapatid na Peter Mamangon, 31; at Philip Mamangon, 34.

Inaresto ang apat sa Barangay 160, Libis Baesa, Caloocan sa pagtatangka umanong bentahan ng P5,000 halaga ng shabu ang isang police poseur-buyer.

Narekober din sa pinangyarihan ang anim na pakete ng hinihinalang shabu, na may bigat na 850 gramo at nagkakahalaga ng P6,150,000.

Ayon kay Lim, hindi kabilang ang mgas suspek sa drug watchlist at walang criminal records.

Inihahanda na ang kasong paglabag sa RA 9165 (Comprehensive Dangerous Drugs Act of 2002) laban sa mga suspek.