Contest sa waste management at paghahalaman sa mga barangay sa Binangonan
NAGLUNSAD ang pamahalaang bayan ng Binangonan ngayong buwan ng Agosto ng contest o paligsahan sa waste management at
paghahalaman sa mga barangay sa mainland ng Binangonan. Ayon kay Binangonan Mayor Cesar Ynares, ang inilunsad na paligsahan ay tinawag na “Inter-Barangay Contest on Waste Management and Gardening”. Pangunahing layunin ng paligsahan na magkaroon pa ng malawak na kaalaman at kamalayan ang mga naninirahan sa mga barangay tungkol sa maayos na pagtatapon ng basura at sa paghahalaman.
Ang nasabing paligsahan ay kaugnay ng patuloy na suporta sa YES (Ynares Eco System) To Green Program, flagship project ni Rizal Governor Nini Ynares na inilunad ng pamahalaang panlalawigan ng Rizal. Ang paligsahan sa waste management ay nasa pangangasiwa ng Municipal Agriculture Office ng Binangonan at sa pakikipagtulungan ng Provincial Agriculture Office ng
lalawigan ng Rizal.
Sa waste segregation, ang municipal agriculture office ng Binangonan ay may mga ibinigay na patakaran na dapat sundin at gawin, tungo sa maayos na waste segregation o paghihiwalay ng mga basura, sa bawat barangay at maging sa gardening o pagtatanim ng mga gulay. Ang mga gulay ay itatanim sa likod-bahay, sa mga bakuran at bakanteng lote sa barangay. Kung walang lugar na pagtataniman ng mga gulay, ang mga nakatira sa barangay ay maaaring magtanim ng gulay sa paso, sa mga basyo ng lata ng sardinas, karne norte at gatas, pati na rin sa mga sirang baldeng plastik.
Ang mga binhi ng mga gulay na itatanim ay libreng ibinibigay ng Municipal Agriculture Office ng Binagonan. Ang mga binhi ng gulay
ay okra, pechay, mustasa, kalabasa, patola, sitaw at iba pang gulay na binabanggit sa awiting bayan na Bahay Kubo.
Ang waste management sa mga barangay at ang paghahalaman ay buwan-buwang pupuntahan ng mga tauhan ng Municipal Agriculture Office, kasama ang mga hurado sa inilunsad na paligsahan. Layunin ng proyekto na matiyak kung maayos at nasusunod ang mga patakarang kanilang inilunsad.
Ang “Inter-Barangay Waste Management and Garening Contest” sa Binangonan ay matatapos sa Nobyembre. Ihahayag ang mga nagwagi sa paligsahan at ipagkakaloob ang gantimpala sa mga nanalong barangay sa isang simpleng programa. Ang pagkakaloob ng gantimpala sa mga nagwagi ay pangungunahan ni
Binangonan Mayor Cesar Ynares, ng mga miyembro ng Sanggunian Bayan at ng mga namamahala sa Municipal Agriculture Office ng Binangonan.
Ang nasabing paligsahan, ayon kay Mayor Cesar Ynares, ay maaaring ilunsad din sa mga barangay sa Talim Island. May 17 barangay sa Talim Island sa bahaging sakop ng Binangonan. Siyam na barangay naman ang nasa bahaging sakop ng Cardona.
Ang nagaganap na mga pag-ulan noong buwan ng Hulyo na dala ng hanging Habagat ay nagresulta sa paglaki ng tubig ngayon sa Laguna de Bay. Kung ngayong Agosto hanggang Nobyembre ay magpapatuloy ang pagkakaroon ng mga malakas na pag-ulan, patuloy din ang pagtaas at paglaki ng tubig sa Laguna de Bay.