Pondo sa road projects, sinasayang ng DPWH—solon

TAGBILARAN CITY - Nagsasayang lamang ng pondo ng bayan ang Department of Public Works and Highways (DPWH) sa isinasagawang road re-blocking activities sa ilang lugar sa lalawigan.

Ito ang alegasyon ni Bohol 2nd District Rep. Erico Aristotle matapos madismaya sa nasabing mga proyekto ng DPWH na hindi pa, aniya, dapat isagawa dahil ang mga kalsadang isinasailalim sa re-blocking activities ay maaari pang magamit sa loob ng limang taon.

Aniya, maayos pa ang naturang mga lansangan at hindi pa nakitaan ng anumang pagkasira.

Nilinaw nito na pinangangasiwaan na ng Department of the Interior and Local Government (DILG) ang pagkukumpuni at rehabilitasyon ng mga kalsada sa lalawigan sa ilalim ng programa nitong Conditional Matching Grant to Provinces (CMGP).

Kabilang, aniya, ang nabanggit na probinsiya sa binigyan ng pondo ng Australian government para sa tinukoy na proyekto.

Kinuwestiyon na rin, aniya, ng mga residente ang ipinatutupad na re-blocking ng DPWH dahil sa umano’y pagsasayang lamang ng pondo.

Sinabi rin ni Aristotle na naghain siya ng panukala sa Kongreso upang harangin ang DPWH at mga contractor nito sa pagpapatupad ng anumang proyekto hanggang hindi pa natatapos ang lifespan o itinakdang itatagal ng lansangan.

Iminungkahi na rin nito sa DPWH na ituon na lamang nito ang kanilang proyekto sa pag-develop o magpalawak ng mga rural road sa lugar.