Peter Lim, nakalusot sa Cebu raid
Nabigong maaresto ng Philippine National Police (PNP) ang negosyante si Peter Lim, matapos salakayin ang bahay nito sa Barangay Mabolo, Cebu City, Cebu, nitong Martes ng gabi.
Ayon sa Cebu City Police Office (CCPO), patuloy nilang tinutugis si Lim nang hindi nila madatnan bahay nito.
Ayon sa CCPO, kasama nila ang Special Weapons and Tactics (SWAT) team nang salakayin lugar ni Lim.
Una nang naglabas ng warrant of arrest si Makati Regional Trial Court (RTC) Judge Gina Bibat-Palamos laban kay Lim at sa kasamahan nitong akusado na si Ruel Malindangan, matapos umanong makitaan ng probable cause ang kasong conspiracy to commit illegal drug trade o paglabag sa Republic Act 9165 (Comprehensive Dangerous Drugs Act of 2002).
Nakipagsabwatan umano ang mga ito sa isang pang druglord na si Kerwin Espinosa sa illegal drug trading sa Visayas.
Si Lim ay sinasabing supplier ng shabu kay Espinosa at kasabwat nitong sina Marcelo Adorco at Ruel Malindangan.
Paliwanag naman ni Senior Supt. Lito Patay, hepe ng CIDG-7, hinihintay pa nila ang utos mula sa kinauukulan at ang hard copy ng warrant of arrest laban kay Lim.
Matatandaang ibinasura ng Department of Justice (DoJ) ang kaso ni Lim na may kaugnayan sa ilegal na droga dahil umano sa mahinang ebidensiya.
Kaugnay nito, bukod sa PNP, kasama na rin ang National Bureau of Investigation (NBI) sa mga tumutugis kina Lim at Malindangan.
Ayon kay DoJ Secretary Menardo Guevarra, inatasan na niya ang NBI na makiisa sa manhunt operations laban sa mga ito.