Ayaw umalis sa riles ng MRT, nabaril
Pansamantalang naantala ang operasyon ng Metro Rail TransitLine 3 (MRT-3) nang makapasok at magpagala-gala ang isang hubo’t hubad na taong grasa sa riles ng tren nito sa area ng Makati City, kahapon ng umaga.
Sugatananghindipanakikilalang lalaki nang mabaril ng guwardiyang si Federico Bustamante, 30, na nakatalaga sa Ayala MRT Station, matapos umanong magwala at pagbabatuhin ang mga guwardiyang nagpapaalis sa kanya sa riles.
Sa incident report ng MRT-3 management, nakapasok ang lalaki sa riles, sa pagitan ng Ayala at Magallanes Stations sa Makati City, bandang 8:43 ng umaga.
Dahil sa presensiya ng lalaki sa riles ay napilitan ang management ng MRT-3 na pansamantalang ipatigil ang kanilang operasyon sa magkabilang linya.
Pinakiusapan umano ng mga guwardiya ng MRT-3 ang lalaki na umalis sa riles dahil nakakaabala ito sa kanilang operasyon, ngunit tumanggi at nakipagtalo.
Dahil dito, napilitan ang mga guwardiya na lapitan at puwersahang paalisin ang lalaki sa riles.
Gayunman, habang papalapit ang mga guwardiya ay bigla umano sila nitong sinugod at pinagbabato, gayundin ang mga dumaraang pampasaherong bus kaya napilitan si Bustamante na mag-warning shot, na ikinasugat ng lalaki sa paa.
Isinugod sa ospital ang lalaki, habang isinailalim sa imbestigasyon ang guwardiyang nakabaril sa kanya.
Nagbalik sa normal na operasyon ang MRT-3 sa ganap na 8:50 ng umaga.