Coco-sugar sa pandaigdigang merkado

HANGAD ngayon ng Philippine Coconut Authority (PCA) na higit pang makapasok ang Pilipinas sa tumataas na pandaigdigang merkado para sa coco-sugar, isang natural na produkto mula sa niyog na marami sa bansa.

Bilang bahagi ng pagdiriwang ng 2018 National Coconut Week, pinamunuan ng PCA ang isang consultative forum nitong Miyerkules, upang talakayin ang mga suliranin at opurtunidad na coco-sugar at kung paano matutulungan ang bansa na makasabay ang produktong ito sa pandaigdigang merkado.

“That’s our plan, as coco-sugar has a lot of potential and opportunities,” pahayag ni PCA Research and Development Deputy Administrator Erlene Manohar sa ginanap na talakayan.

Gumagamit ng farm-level technology sa produksiyon ng Coco-sugar, kabilang ang natural na proseso ng heat evaporation upang maging sugar granules ang coconut’s liquid sap, paliwanag ng PCA.

Nabanggit din ng ahensiya ang pag-aaral ng Food and Nutrition Research Institute noong 2007, na nagpapakita ng coconut sap sugar’s glycemic index (GI) sa 35.

Ang resultang ito ang nagpapatunay sa coco-sugar bilang isang low-GI food, ayon sa ahensiya.

“GI is a ranking system for carbohydrates, based on immediate effect on blood glucose level,” pagpapatuloy ng PCA. “Low-GI food will cause a small rise in blood glucose level. High-GI food will trigger a dramatic spike. The higher the GI value, the greater the blood sugar response.”

Ayon pa kay Manohar, nakatutok ang PCA sa pagsusulong ng coco-sugar, na tinitingnan bilang isang papasikat na produkto, partikular sa tumaas na demand ng mga mamimili sa kalusugan.

Samantala, umaasa si PCA Administrator Romulo de la Rosa na ang tumataas na demand sa mga alternatibong produkto na pampatamis ang magsusulong sa industriya, gayundin sa mga produktong herbal para sa katawan.

Hindi man pormal na natutukoy sa global na kalakalan, inaasahan na ang patuloy na paglago ng coco-sugar sa susunod na walong taon.

Kabilang sa mga pangunahing merkado para sa coco-sugar ang mga bansa ng Australia, New Zealand, US, South Africa, North at Latin America, France, Canada, Norway, Europe, Japan, at ang Middle East.

Habang ang Indonesia, Thailand at Pilipinas ang pangunahing producers at exporters ng granulated coco-sugar sa kasalukuyan, ani Manohar.

Bagamat mas marami ang nailalabas na produkto ng Indonesia dahil sa mas mababa nitong presyo, nilinaw naman ni Manohar na ang coco-sugar na gawang Pilipinas ay may mataas na kalidad, lalo’t hindi ginagamitan ng anti-fermenting agent.

Sa halip na ibaba ang presyo upang sumabay sa mga katunggali, ang kinakailangan umano ng bansa ay isang market positioning strategy para sa produkto.

“What we failed looking into is how to classify coco-sugar,” saad ni Manohar.

“Our goal is to instead align coco-sugar with medical aspects like being good for diabetics and having nutritional value,” aniya.