Mayor suspendido sa pamumutol ng puno
Pinatawan ng 90-day preventive suspension si Calaya, Antique Mayor Genevieve Gumban Lim-Reyes dahil sa kasong graft at paglabag sa kasong Coconut Preservation Act.
Ibinaba ng 5th Division ng anti-graft court ang suspensyon habang dinidinig pa ang kinakaharap na kasong paglabag sa Republic Act (RA) 3019 (Anti-Graft and Corrupt Practices Act) at kasong paglabag sa RA 8048 dahil sa pagkakasangkot nito sa clearing operations sa limang ektaryang lupaing kinatatayuan ng bahay ng complainant na si Juliet Ramos, na nagresulta sa pagkakaputol ng 245 puno ng niyog sa Barangay Tinogboc, Calaya noong Pebrero 28, 2014.
Ang suspension order ng korte ay bunsod na rin sa kahilingan ng prosekusyon at ito ay kinontra naman ni Lim-Reyes nitong Hulyo 31.
Depensa ng alkalde, invalid ang isinampang kaso laban sa kanya dahil ang umano’y pagkakadawit nito sa pamumutol ng mga puno ng niyog ay walang kinalaman sa katiwalian.
Aniya, maaaring mahatulan ito sa parehong krimen sa iisang kaso na kinatatampukan ng Section 13 ng Rule 110 ng Rules of Court, na nagsasaad na dapat ay saklaw lamang ng isang krimen ang isang naisampang kaso ngunit hindi ito binigyang-bigat ng hukuman.
“The Rule prohibits the filing of an Information which charges more than one offense, however, in the present case, the prosecution charged the accused with two offenses, contained in two separate Informations, with each Information charging only one offense, which makes the allegation of the accused untenable,” sabi ng ruling ng hukuman.
Ipinaliwanag pa ng anti-graft court na hindi idinaan ng alkalde sa legalidad ang naging hakbang nito.