R260-M Tawi bridge para sa turismo at kaligtasan
IBINAHAGI ng Department of Public Works and Highways (DPWH) sa Cagayan Valley ang pagsisimula ng P260 milyong halaga ng proyektong tulay sa Peñablanca, Cagayan.
Ayon kay DPWH Regional Office-2 Director Melanio C. Briosos, makalipas ang 30 taong paghihintay ay pinahintulutan na ang pagpapatayo ng tulay para sa mga residenteng naninirahan sa lugar.
Aniya, dumarating ang DPWH upang matulungan ang mga tao sa pamamagitan ng Tawi bridge sa pakikipagtulungan ng Department of Tourism (DoT) at mga lokal na pinuno.
Ayon kay Briosos, isang bago, matibay at pangmatagalang tulay ang papalit sa lumang tulay, na tatapos sa pagtitiis ng mga tao na matagal nang ipinagsasapalaran ang kanilang buhay at ari-arian sa tuwing tatawid sa lumang tulay at nagbibigay panganib sa mga motorista sa nakalipas na mga taon.
Inaasahan namang makatutulong ang proyekto sa pagsasaayos at paglalaan ng mga direktang access papunta at sa pagitan ng mga nakapaligid na barangay at bayan, gayundin sa pagdadala ng mga produkto at serbisyo.
Sa pamamagitan ng 270-metromg tulay, hindi na mahihirapan ang mga residente sa loob ng barangay ng Peñablanca sa pagdadala ng kanilang mga produktong pang-agrikultura sa mga komersiyal na pamilihan, dagdag ni Briosis.
Kabilang sa mga inaasahang makikinabang sa Tawi Bridge ang 13 barangay ng Bugatay, Nabbabalayan, Minanga, Lappi, San Roque, Nannaryan, Agugaddan, Malibabbag, Callao proper, Sisim, Buyun, Lagum, Mangga, at Cabasan.
Sinabi naman ni DoT-2 Regional Director Virgilio Maguigad na makatutulong din ang tulay sa pagpapasigla ng turismo para sa Callao Caves at iba pang mga sikat na lugar.
Bukod dito, inaasahan ding magdudulot ng mabilis na pag-angat sa mga aktibidad sa ekonomiya at turismo sa lugar ang proyektong tulay, lalo’t mayaman sa mga likas na yaman ang bayan ng Peñablanca.
Ipinaalam naman ni Construction chief Jose B. Tobias na inaasahang makukumpleto ang unang bahagi ng proyekto bago pa ang target na petsa ng Disyembre 31, 2018.