Kampanya vs rice smuggling, sinisi sa kakapusan
Naniniwala ang National Food Authority (NFA) na posibleng ang paghihigpit ng pamahalaan sa rice smuggling ang dahilan kaya kinulang at tumaas ang presyo ng bigas sa Zamboanga City.
Ayon kay NFA spokesperson Director Rex Estoperes, nagmula sa Malaysia ang ilang bahagi ng bigas na isinu-supply sa Mindanao, partikular sa Zamboanga.
Bagamat may iba pang dahilang nakikita ang NFA sa pagtaas ng halaga ng bigas sa Zamboanga City, ang paghihigpit ng pamahalaan sa rice smuggling ang nakikita ring dahilan kaya sumipa nang husto ang presyo nito.
Matatandaang sa pangatlong State of the Nation Address (SONA) ni Pangulong Duterte ay nagbanta ito laban sa mga rice smuggler, cartels at hoarders.
Isinailalim na sa state of calamity ang Zamboanga City makaraang pumalo sa P70 kada kilo ang commercial rice sa siyudad, mula sa dating P50.
Tiniyak naman ni Estoperes na tutugunan ng NFA ang kakapusan ng bigas sa Zamboanga sa pagpapadala ng sapat na supply ng NFA rice sa siyudad.
Kaugnay nito, hinimok naman ni House Appropriations Committee chairman at Davao City Rep. Karlo Nograles ang NFA na imbestigahan ang rice traders sa lungsod.
Aniya, posibleng may price manipulation ang mga rice trader sa Mindanao kaya sumirit ang presyo ng bigas sa Zamboanga City.
Nais naman ni Senator Win Gatchalian na buwagin na lang ang NFA dahil sa kapalpakan nito, at upang maisalba na rin, aniya, ang ipinasasahod sa mga opisyal ng ahensiya.
“lsa sa mga problemang nakikita ko kaya kulang ang supply at mataas ang presyo ng bigas ay iyong operations ng NFA. Hindi maayos at hindi nagagampanan ang responsibilidad nito,” ani Gatchalian, chairman ng Senate Committee on Economic Affairs.
Aniya, taun-taong bumababa ang kita ng NFA, at batay sa ulat ay nalugi ito ng 38%, o nalugi ng P17.93 bilyon, noong 2017, mula sa P29.3 bilyon noong 2016.