GG NA MAY FORMALIN, HAHARANGIN

Sinabi ng Malacañang na hindi hahayaan ng gobyerno na makapasok sa bansa ang galunggong na may formalin, kasabay ng paghikayat sa mga kinauukulang ahensiya ng gobyerno na bigyangpansin ang isyu.

Ito ang ipinahayag ni Presidential Spokesperson Harry Roque matapos magbabala si Health Secretary Francisco Duque III sa publiko laban sa pagkain ng imported na galunggong na may mapanganib na kemikal.

Babala ng grupo ng mga mangingisda na Pambansang Lakas ng Kilusang Mamamalakaya ng Pilipinas (Pamalakaya), gumagamit ng formalin ang China upang mapreserba ang mga isda nito.

Sa press briefing nitong Huwebes, sinabi ni Roque na mayroong mga hakbangin na maaaring gamitin ang gobyerno, kung totoo nga ang nasabing ulat.

“Kung may ganyan pong alegasyon ay meron naman po tayong Department of Health (DoH), meron tayong Department of Agriculture (DA), at alam ko po meron tayong phytosanitary measures na pupuwedeng gamitin,” aniya.

“So, I think the DA and the DoH have heard these allegations and I don’t think the government will allow the entry of these tainted fish products,” dagdag ni Roque.

Nitong nakaraang linggo, inaprubahan ni DA Secretary Emmanuel Piñol ang importasyon ng nasa 17 metriko tonelada ng galunggong simula Setyembre hanggang Disyembre ngayong taon, upang mapanatili ang presyo bago ang pagtatapos ng panahon ng pangingisda.