Kaanak ng massacre victims, gigil sa furlough
COTABATO CITY – Nagpahayag ng matinding galit ang mga kaanak ng mga biktima ng nakakikilabot na 2009 Maguindanao massacre kaugnay ng hindi ipinaalam sa kanilang pag-apruba ng korte sa furlough para sa isa sa mga pangunahing suspek sa krimen na si Zaldy Ampatuan, upang dumalo sa kasal ng anak nitong babae sa isang hotel sa Metro Manila nitong Martes.
Sa pangunguna ni Maguindanao Board Member Jazzer “King” Mangudadatu, nagkani-kanyang pagpapahayag ng sama ng loob sa Facebook at sa mga lokal na mamamahayag ang mga kaanak ng 58 pinaslang sa massacre, at sinabing ang furlough na ipinagkaloob kay Ampatuan ay malinaw na “implied mockery” ng hustisya, at nagpaigting sa sinasabi ni Ampatuan na kalaunan ay makakalaya na rin siya sa piitan.
Ayon kay Mangudadatu, ang kawalan ng notice sa mga naghain ng kaso at mga kaanak ng mga biktima tungkol sa furlough grant ay nagpatindi lang sa suspetsang nababayaran umano ang hudikatura.
“Ang mga hurado ba ay nababayaran pa rin ng salapi ngayon?”, ani Mangudadatu.
Labingtatlong taong gulang pa lang ang opisyal nang ang buntis niyang ina na si Ginalyn, dalawang tiyahin, at 55 iba pa ay pagpapatayin noong Nobyembre 23, 2009 sa isang liblib na lugar sa Ampatuan, Maguindanao.
Tatlumpu’t dalawa sa mga nasawi ay mamamahayag na magko-cover lang ng paghahain sana ni Ginalyn ng certificate of candidacy para gobernador ng asawang si noon ay Buluan Vice Mayor Esmael Mangudadatu, sa bayan ng Shariff Aguak.
Gobernador ng Autonomous Region in Muslim Mindanao (ARMM) nang mangyari ang massacre, nakunan ng video si Ampatuan habang isinasayaw ang bagong kasal niyang anak na si Nur Aila sa dance floor ng Sofitel Hotel nitong Martes.
Martes din ng gabi nang i-post sa Facebook ni Tawi-Tawi Rep. Ruby Sahali, isa sa 60 wedding sponsors, ang nasabing video.
Iginiit naman ni Board Member Mangudadatu na ang apat na oras na furlough ni Ampatuan ay may presensiya ng “VIP treatment” sa Bicutan detention facility.
Sa kanyang tugon sa protest publication ng National Union of Journalists of the Philippines (NUJP), sinabi ni Justice Secretary Menardo Guevarra: “The prosecution vigorously opposed Zaldy Ampatuan’s motion for furlough to attend his daughter’s wedding, but the court granted the motion for humanitarian reasons.”