3 estudyante huli sa droga
Tatlong estudyante ang inaresto sa Pasay at Taguig City, kamakalawa.
Sa Pasay, inaresto ang isang high school student makaraang masamsaman ng tatlong pakete ng umano’y shabu sa pinapasukan nitong paaralan sa nasabing lungsod.
Hindi nag-atubili ang guwardiya ng paaralan na arestuhin ang suspek, 17, nakatira sa Ivy Street, Barangay 184, Maricaban sa nasabing lungsod.
Agad na ini-report sa awtoridad ang pagkakahuli sa suspek at rumesponde ang mga tauhan ng Police Community Precinct (PCP) 8 at inaresto ang estudyante at binitbit sa tanggapan ng Station Drugs Enforcement Unit (SDEU).
Kakasuhan ang suspek ng paglabag sa RA 9165 (Comprehensive Dangerous Drugs Act of 2002).
Samantala sa Taguig, nalagay sa balag na alanganin ang dalawang college students makaraang makumpiskahan ng droga at drug paraphernalia sa isang unibersidad sa nasabing lungsod.
Nasa kustodiya ng Taguig City Police sina John Clement Try Manalo y Medina at Janine Cardozo y Ilang-Ilang, kapwa nasa hustong gulang.
Sa ulat, inaresto ang mga suspek sa bisinidad ng unibersidad na matatagpuan sa Central Bicutan, Taguig City, bandang 2:30 ng hapon.
Nagpapatrulya ang mga tauhan ng Police Community Precinct (PCP) 5 –Maharlika, kasama ang barangay security force na sina Roberto Nachor at Dexter Robles, nang mamataan ang dalawang estudyante na kahina-hinala ang kilos, kaya sinita hanggang sa nakuha ang limang pakete ng umano’y marijuana, na may timbang na walong gramo, at isang tooter na naglalaman ng naturang droga.
Patuloy na iniimbestigahan ang mga suspek sa tanggapan ng Station Drugs Enforcement Unit (SDEU).