Palawan kinilalang ‘Most Dynamic Province’ sa Mimaropa
SA unang pagkakataon, kinilala ng National Nutrition Council (NNC) ang Palawan bilang “Most Dynamic Province on Nutrition Program Implementation in 2017” sa buong rehiyon ng Mimaropa (4-B).
Nitong Martes, ibinahagi ni Palawan Provincial Nutrition Action Office (PNAO) chief Rachel Paladan na nakuha ng probinsiya ang parangal sa idinaos na 2018 Mimaropa Regional Nutrition Awarding Ceremony, nitong Agosto 16.
Ayon kay Paladan, ang natanggap nilang karangalan ay sapat na kabayaran para sa probinsiyal na pamahalaan na nagsumikap upang maibaba ang malnutrition prevalence rate (MPR) at mabalanse o mas bumaba sa limang porsiyento ng pamahalaan.
“Siyempre ang ating goal talaga at ‘yung target natin is ma-reach ‘yung 5 percent malnutrition prevalence rate ng national at ’yung malnutrition reduction program,” aniya.
Sinabi rin ni Paladan na nananatili ang probinsiya sa status nito sa pagkakaroon ng pinakamataas na kaso ng malnutrisyon sa buong Mimaropa.
Nabanggit din niya na ang mga bayan ng Rizal, Balabac at Quezon sa katimugang bahagi ng southern Palawan, at Roxas, Agutaya, Busuanga, Linapacan at Cuyo sa hilagang bahagi ang mayroong matataas na kaso ng insidente.
“Kasi ang isa rin talagang layunin natin dito lalo na habang buntis pa lamang ang nanay dapat talaga ay maalagaan na natin para hindi sila dumating sa sinasabing social problem,” paliwanag ni Poaladan.
Sa hiwalay na panayam, sinabi ni NNC-Mimaropa regional coordinator Carina Santiago na ang pagkakapili sa Palawan ay dahil sa enerhiya nitong isulong ang lahat ng inisyatibo at pagsisikap laban sa malnutrisyon, lalo na sa mga malalayong barangay.
“Ang Palawan ay binigyan namin ng Most Dynamic Province Award ngayong taon because nakitaan namin talaga na ito ay nagsumikap, ‘yung dynamism na sinasabi nandoon hindi lang in terms na magkaroon ng mga programa ang mga munisipyo,” aniya.
Idinagdag pa ni Santiago na hindi lamang mga health workers ang namamahala sa Palawan, kundi pati ang mga kapitan ng barangay sa pag-iimplementa ng mga programa at proyekto hinggil sa nutrisyon.
“Talagang kina-capacitate hindi lang ‘yung mga worker kundi pati ‘yung mga barangay captains at of course, maayos ang pagpapatupad ng province. Ang gusto ko talagang ginagawa ng province ay ‘yun talagang tinututukan ang nutrition ng mamamayan,” ani Santiago.
Bilang pasasalamat, sinabi ni Paladan na nararapat lamang ibigay ang pasasalamat kina Governor Jose Alvarez, Board Member Eduardo Modesto Rodriguez, sa Provincial Board, at ilang stakeholders, na silang nagbibigay ng pangangalaga sa nutrisyon sa probinsiya.