Mga magulang, ‘di payag na magpa-tattoo ang mga anak
HINDI dapat na mabahala ang mga magulang na pinagbawalan ang kanilang mga anak na magpa-tattoo dahil karamihan sa mga magulang ang hindi pumapayag na magpalagay ng tattoo ang kanilang mga anak. Napagalaman sa bagong U.S. survey na 78% ng mga magulang ang hindi papayag na magpa-tattoo ang kanilang mga teenager na anak.
Tinanong ng nationally-representative poll ang mga magulang ng mga batang edad 13-18 tungkol sa kanilang pananaw tungkol sa tattoo. Karamihan, o 75%, ang naniniwala na ang mga mga teenager ay dapat lang payagang magpa-tattoo sa edad na 18 pataas, ayon sa resulta na inilathala sa C.S. Mott Children’s Hospital National Poll on Children’s Health.
Ang naturang bilang ay kinabibilangan ng mga magulang na may mga tattoo: 32% mula sa kabuuang bilang.
“It’s important for parents to know what other parents are thinking,” sabi ni Dr. Gary Freed, pediatrician sa University of Michigan at sa C.S. Mott Children’s Hospital sa Ann Arbor at codirector ng National Poll on Children’s Health. “It is increasingly becoming a topic of conversation in homes across America.”
Ang ipinag-aalala ng mga magulang ay ang potensiyal na epekto sa kalusugan ng pagpapalagay ng tattoo: 53% ang nagsabing ang ikinababahala nila ay ang pagkakaroon ng impeksiyon o pagpepeklat ng tattoo, habang 50% ang nagpaliwanag na natatakot silang baka mahawa ng sakit ang kanilang mga anak gaya ng hepatitis o HIV, na maaaring maisalin sa hindi malinis na karayom.
Hindi ibig sabihin nito na anti-tattoo ang mga magulang. Halos two-thirds, o 63%, ang sumang-ayon na ang paglalagay ng tattoo ay isang uri ng self-expression, gaya ng pagkukulay sa buhok at istilo ng pananamit.
Upang maiwasan ang anumang isyu tungkol sa kaligtasan sa kalusugan kapag nagpa-tattoo, sinabi ni Freed na pagbutihan ang pagpili sa tattoo artist: “Make sure if you do get a tattoo that the tattoo artist wears gloves and that everything gets sterilized.”