Dragon Boat, medal potensyal sa PH Team

PALEMBANG – Matapos makakuha ng dagdag na araw para makapagensayo, umaasa ang sambayanan sa matikas na kampanya ng Philippine dragon boat squad sa 18th Asian Games nitong Saturday sa pagparara ng men’s and women’s 200-meter events sa Jakabaring Sports City Regatta course dito.

Mismong si Philippine Olympic Committee (POC) president Ricky Vargas ay naniniwala na ang dragon boat, ay may malaking potensyal para manalo ng medalya sa quadrennial sportsfest.

Umaasa naman ni Philippine Canoe Kayak Dragon Boat Federation president Jonne Go na makakasabay ang Filipino paddlers sa mga karibal.

“It is going to be a tough fight for all of the countries that are competing in the Asian Games. They are all prepared,” sambit ni Go. “Depende na lang on how conditioned the mind of the athletes are.”

Ayon kay Go, tangan ng Pinoy ang momentum mula sa matagumpay na kampanya sa Asian Canoe Federation Asian Dragon Boat Federation Dragon Boat Championships sa Dali, China nitong Hulyo kung saan nagwagi ang bansa ng dalawang gintong medalya.

Winalis ng men’s squad ang 200-meter at 500-meter standard races laban sa Asian powers Thailand at Myanmar.

“But the times in these events were so close, just milliseconds, so it could still be anybody’s race,” aniya.

Sasabak din ang men’s team sa 500-meter at 1,000-meter races, habang ang women’s squad ay lalaban sa 500-meter race.