5-anyos sinikmuraan ni tito, dedo

Patay ang isang batang babae nang suntukin ng kanyang tiyuhin, na napikon sa asaran sa Port Area, Maynila.

Kasalukuyang naghihimas ng rehas si Jerome Emberso, 28, sa tanggapan ng Manila Police District (MPD)-Crimes Against Persons Investigation Section (CAPIS), matapos patayin si Gwendel Constantino, 5, kapwa residente ng Baseco Compound, Port Area.

Batay sa ulat ng MPD-CAPIS, na pinamumunuan ni Police Senior Insp. Rommel Anicete, naganap ang krimen sa Baseco Compound, pasado 9:00 ng gabi nitong Linggo.

Umalis umano sa bahay Constantino nang hindi nagpapaalam sa kanyang foster parent, si Amelia Milla, at magmula noon ay hindi na umuwi kaya ini-report na sa barangay at mga pulis.

Pagsapit nitong Lunes, bandang 12:30 ng tanghali, nadiskubre ang bangkay ng biktima sa loob ng isang abandonadong computer shop, na karugtong lamang ng bahay ng biktima.

Sa kuha ng closed-circuit television (CCTV) camera, natukoy ng awtoridad ang suspek kaya agad na itong dinakip sa kanyang pinagtatrabahuhan sa Binondo, Maynila.

Ayon kay Emberso, nakikipaginuman siya nang mapikon sa pangaasar ng bata kaya sinikmuraan niya ito hanggang sa nangisay.

Natakot umano ang suspek kaya binuhat ang bata at dinala ang katawan nito sa abandonadong computer shop.

Kasong murder ang isasampa laban sa suspek.