‘Gun-runner’ todas sa buy-bust
Patay ang isa sa dalawa umanong gun-runner sa buy-bust operation sa Muntinlupa City, kamakalawa ng hapon.
Dead on the spot si Angelo Garcia y Tuna, alyas Bunso, 21, ng No. 117 Tales Compound, Parañaque City.
Patuloy namang inaalam ng awtoridad ang pagkakakilanlan ng kanyang kasabwat, na tumakas sakay sa motorsiklong walang plaka.
Sa ulat ng Southern Police District (SPD), nauwi sa engkuwentro ang buy-bust operation ng mga tauhan ng Criminal Investigation Detection GroupNational Capital Region (CIDG-NCR), sa pangunguna ni Chief Insp. Ryan Jay Orapa, sa kahabaan ng Don Pedro Reyes Avenue, Victoria homes, Barangay Tunasan, sa Muntinlupa City, bandang 1:30 ng hapon.
Sa inisyal na imbestigasyon, nagsilbing poseur-buyer si PO2 Kristauffer Villarosa habang immediate back-up niya si PO3 Bryan Castillo.
Dumating sa lugar ang dalawang suspek, na magkaangkas sa motorsiklo, at nagkasundo sa transaksiyon sa baril.
Sa gitna ng transaksiyon, nahalata umano ni Garcia na parak ang kanilang kausap kaya mabilis umano itong bumunot ng baril at pinaputukan sina PO2 Villarosa at PO3 Castillo, na kapwa nakailag hanggang sa nagkapalitan ng bala at bumulagta si Garcia habang nakatakas ang isa pa.
Narekober sa pinangyarihan ang isang cal. 45 pistol, na kargado ng apat na bala; anim na basyo at isang fired bullet habang nasamsam kay Garcia ang P1500 buy-bust money; tatlong pakete ng umano’y shabu at leather wallet na naglalaman ng photocopy ng kanyang discharge certificate mula sa Bureau of Jail Management and Penology-National Capital Region (BJMP-NCR), na nakapangalan kay Angelo Garcia y Tuna; at court order mula sa Pasay City Metropolitan Trial Court (MTC) Branch 45 para sa kasong trespass to dwelling.