PO1s ng San Juan police, isinailalim sa seminar
Isinailalim sa Anger and Stress Management Seminar ang mga tauhan ng San Juan City Police kamakalawa, kasunod ng insidente ng pakikipagtalo ng isang bagitong pulis sa isang mekaniko sa anticriminality operation sa lungsod.
Ayon kay San Juan Police chief, Police Senior Supt. Dindo Reyes, nasa 35 Police Officers 1 (PO1) ang binigyan ng lecture at briefing upang maturuan kung paano i-handle ang kahalintulad na sitwasyon at mga dapat sundin sa ilalim ng standard operational procedures (SOP).
Nabatid na ang naturang seminar ay isinagawa rin sa ilalim ng EPD CARES program o Care and Reformation Services (CARES), na inilunsad ni Eastern Police District (EPD) director, Police Senior Supt. Joel Bernabe Balba.
Binuo ang programa upang ayudahan ang kanilang mga personnel na dumaranas ng depresyon at psychological stress, na nakakaapekto sa kanilang pag-uugali at performance sa kanilang trabaho na maaaring mauwi sa misdemeanor o ilegal na aksiyon.
Una rito, nag-viral sa social media si PO1 Harold James Geronimo, kasama ang iba pang pulis, na nakikipagtalo sa mekanikong si Jesus Valiente, habang nagsasagawa ng “Oplan Bulabog” sa Road 1, Barangay West Crame.
Bago ang argumento ay sinabihan umano ng pulis ang mekaniko na alisin ang kanyang truck dahil ilegal ang pagkakaparada nito at nakakaabala sa daloy ng trapiko.
Tumanggi umano si Valiente at nakipagtalo pa sa pulis at kinunan ng video kaya hindi na nakapagtimpi ang pulis at itinulak ang mekaniko na ikinabuwal nito.
“We taught them the proper intervention on that kind of situation and implement maximum tolerance, pagpapakumbaba is importante as policemen, we are expected to have a higher level of tolerance and remind them not to lose temper,” paliwanag ni Police Supt. Joselito Villarosa, Assistant Chief of Police for Administration (ACOPA) ng San Juan Police Station, na namahala sa seminar.