6th title defense ni Ancajas, ikinasa ng Top Rank

ITATAYA ni IBF super flyweight champion Jerwin Ancajas ng Pilipinas ang kanyang titulo sa ikaanim na pagkakataon laban kay Mexican slugger Alejandro Santiago Barrios sa Setyembre 28 sa Oracle Arena sa Oakland, California.

Ang sagupaang AncajasSantiago na ipalalabas nang live ESPN ay sa ilalim ng promosyon ng Top Rank Inc. katulong ang MP Promotions at Zanfer Promotions.

“I am very excited to defend my title in Oakland in front of the great fans there, and I look forward to a great challenge from Santiago,” sabi ni Ancajas. “There is a large Filipino community in Northern California, so I expect an incredible atmosphere inside the Oracle Arena. I also want to thank MP Promotions, Sean Gibbons, Top Rank, and Mr. Bob Arum for this opportunity.”

May rekord si Ancajas na 28-1-1 na may 19 pagwawagi sa knockouts at nagkampeon noong Setyembre 3, 2016 nang pabagsakin sa 8th round si Puerto Rican McJoe Arroyo para magwagi via 12-round unanimous decision.

Naidepensa ni Ancajas ang kanyang titulo tatlong beses noong 2017 at dalawang beses nitong 2018 kaya siya ang pinakaaktibong super flyweight champion sa buong mundo.

May kartada si Santiago na 16-2-4 na may 7 panalo sa knockouts at huling natalo noong Agosto 2015. Huli siyang lumaban noong Marso 14, 2018 sa Ponce, Puerto Rico nang tumabla kay WBO NABO super flyweight titlist Jose Martinez na isang Puerto Rican.