Davao Cocolife Tigers, angat sa Kapampangan

BALIK ang Davao Occidental COCOLIFE sa kanilang balwarte bitbit ang isang kumbinsidong panalo upang paghandaan ang panibagong hamon sa nakatakdang bakbakan ng 2018 Maharlika Pilipinas Basketball League Davao invasion sa Agosto 30.

Nilapa ng Davao COCOLIFE Tigers ang palabang Pampanga Lanterns,82-77 kamakalawa sa Alonte Sports Center , Binan City sa Laguna.

Nagpasiklab si dating pro Bonbon Custodio partikular sa krusyal na endgame upang ibulsa ng Davaoenos ang ika-apat na panalo sa pitong laro at ipalasap naman sa mga Kapampangan ang pang-apat na kabiguan sa pito ring asignatura sa Datu Cup ng ligang inorganisa ni Sen. Manny Pacquiao.

Angat ang Lanterns,75-74, higit 2 minuto sa laban nang kumamada si Custodio ng anim na sunod na puntos upang umangat tungo sa pagtala ng kumbinsidong panalo ng Mindanao team ni Madam Claudine Bautista kaagapay sina COCOLIFE president Elmo Nobleza,FVP Joseph Ronquillo at AVP Rowena Asnan.

Nag-ambag din sa panalo ng Tigers sina PBA veterans Leo Najorda ,Mark Yee at Billy Robles na may 21,14 at 13, ayon sa pagkakasunod.

Nabalewala naman ang magiting na laban ni Pampangos Michael Juico na may game high 26 puntos katuwang si Jerry Nacpil na may 10 puntos.

Ang Davao Occidental COCOLIFE sa pangangasiwa nina Bhong Baribar at Ray Alao sa timon ni coach Don Dulay ah haharapin ang Valenzuela sa Agosto 30 sa Davao City.