Batang nalock, nahulog sa 16th floor

Patay ang isang batang lalaki nang aksidente umanong mahulog mula sa bintana ng ika-16 na palapag ng gusali sa Parañaque City, kamakalawa ng hapon.

Kinilala ang biktimang si Lucky Parana y Bukid, 4, ng No. 324 Lower Sto. Niño, Cogio, Antipolo.

Sa naantalang ulat ni Senior Supt. Victor Leon Rosete, hepe ng Parañaque City Police, naganap ang insidente sa isang condominium unit na matatagpuan sa Barangay Marcelo Green sa nasabing lungsod, bandang 1:45 ng hapon.

Sa pahayag sa awtoridad ng ina ng bata, si Salvacion Parana, 40, caretaker ng condominium unit, nagpunta sila roon ng anak upang kunin ang susi mula sa unit guest na katatapos lang magcheckout at linisin ang nasabing lugar.

Subalit sa hindi inaasahang pangyayari, nang magtapon ng basura si Salvacion at iwan ang biktima sa loob ng unit, ay aksidenteng nagsara ang main door.

Napansin lamang ni Salvacion na naka-lock ang pinto nang tangkain buksan ngunit ayaw kaya agad na humingi ng tulong upang mabuksan ang pinto, subalit wala umanong duplicate key kaya nagtungo pa siya sa engineering office.

Nang mabuksan ang pinto, agad nilang hinanap ang bata at natagpuan sa metal grills sa ibaba ng parking lot.

Sinasabing binuksan ng bata ang bintana ng unit at doon dumaan na naging sanhi ng kanyang pagkahulog.

Tinangka pang isugod sa ospital ang biktima, ngunit hindi na umabot nang buhay.

Patuloy na iniimbestigahan ang pangyayari.