Resignation ni Piñol, Aquino ‘di kailangan

Hindi lahat ng congressmen ay nais na magbitiw sina Department of Agriculture (DA) Secretary Manny Piñol at National Food Authority (NFA) Administrator Jason Aquino sa gitna ng krisis sa food supply at mataas na presyo ng mga bilihin.

Para kay ANAC-IP Party-List Rep. Jose Panganiban Jr. walang problema kung mananatili sa puwesto ang dalawang kontrobersiyal na opisyal. Sa katunayan nais niyang tulungan ang bawat isa sa mga ito na matugunan ang problema.

“Hindi naman sila kailangang magbitiw...At hindi sila dapat magaway kasi food security yong mandato ng kanilang mga ahensiya,” ani Panganiban sa panayam ng DZBB radio kahapon.

Ang mambabatas ang namumuno sa House Committee on Agriculture and Food.

“Pagdating kay Secretary Piñol, OK naman ang trabaho niya. Pagdating kay NFA Administrator Aquino, siguro lamang is coordination, tamang coordination ng NFA Administration at NFA Council,” aniya.

Kapwa nananawagan ang mga mambabatas ng minorya at mayorya sa Kamara ng resignation ng dalawang opisyal dahil sa patuloy na pagtaas ng presyo ng mga produktong agricultural.

Tinukoy ni Panganiban na problem area ang tila mahinang koordinasyon ng opisina ni Aquino at ng 18-member NFA Council.

“Hindi makagalaw ang NFA without the concurrence or without the policy of the NFA Council. Doon ngayon nagkakaroon ng problema. Minsan hindi nagkakaintindihan ang NFA administrator at NFA Council at ang end result nito, yong murang bigas sa merkado ang nawawala. Nawawala ang supply,” paliwanag niya.

Samantala, hinimok ni Camarines Sur 2nd District Rep. LRay Villafuerte ang Congress na lumikha ng Department of Fisheries and Aquatic Resources (DFAR).

“The Executive and legislative departments should deal with this with a sense of urgency, considering the huge effect of rising fish prices on the inflation uptrend,” ani Villafuerte.