Local Price Coordinating Councils pinakikilos

Iginiit ni Interior and Local Government officer-in-charge (OIC) Eduardo M. Año ang agarang reactivation ng Local Price Coordinating Councils (LPCCs) sa gitna ng pananamantala ng ilang grupo na nagpapataw ng napakataas na presyo sa mga pangunahing bilihin.

Sa paghihirap ng milyun-milyong mamamayan sa tumataas na inflation rate sa bansa, inatasan ni Año ang Philippine National Police (PNP) na ipatupad ang batas at palakasin ang consumer rights para protektaan sila laban sa mga tiwaling negosyante.

Naglabas siya ng direktiba matapos matanggap ang ulat mula sa regional at field offices sa diumano’y pagtaas ng presyo ng mga bilihin sa ilang local government units (LGUs) lalo na pagkatapos ng mga bagyo nitong mga nakaraang linggo.

Pinanindigan ni Año na dapat magsagawa ang LPCCs ng regular inspection sa mga pampubliko at pribadong pamilihan, tugunan ang mga iniulat na pananamantala ang mga lokal na negosyante at bigyan ng kapangyarihan ang mga opisyal ng barangay at nongovernment organizations (NGOs) na i-monitor ang abnormal na pagtaas ng mga bilihin.

Hiniling din niya sa LPCCs na magsagawa ng malalimang analysis sa sanhi ng pagtaas ng mga presyo, magsuhestiyon ng mga hakbang para maitama ang unwarranted price increases at kakulangan ng mga supply, at magrekomenda ng suggested retail prices sa mga ahensiya ng pamahalaan.

“Our LGUs, barangays and the DILG regional and field offices should make active coordination with agencies like the Department of Trade and Industry (DTI) and the Department of Agriculture (DA) to thwart unnecessary price adjustments and hoarding of primary goods like rice,” aniya.