Bebot dinakma sa pangingikil sa passport

Arestado ang isang babae sa paghahawak ng pasaporte ng isang nagnanais maging overseas Filipino worker (OFW).

Nagsagawa ng entrapment operation ang mga tauhan ng General Assignment and Investigation Section (GAIS) ng Manila Police District (MPD) laban kay Leilani Geslaya, 47, freelance recruitment agent, sa isang fast-food restaurant sa Quirino Avenue corner San Andres, sa Malate, Maynila, bandang 1:30 ng hapon kamakalawa.

Ayon kay case investigator PO2 Dean Mark Regala, si Geslaya ay inireklamong nangikil ng pera sa complainant, si Rosemarie Rodil, 42, kapalit ng pasaporte ng huli.

Ang nasabing dokumento ay hawak ni Geslaya simula pa noong Pebrero ng nakaraang taon nang mag-apply si Rodil bilang domestic helper sa Middle East.

Kalaunan ay umatras ang biktima nang malaman na siya ay magtatrabaho bilang cleaner sa halip na domestic helper.

Gayunman, pinagbabayad umano ng suspek ang biktima ng P8,200 upang mabawi ang kanyang pasaporte.

Hindi magawa ni Rodil ang nais ni Geslaya dahil wala siyang budget.

Ngunit nitong unang bahagi ng taon, muling tinawagan ni Rodil si Geslaya upang muling pagbigyan ang kanyang pangarap na makapagtrabaho sa ibang bansa.

“Kinontak niya uli si Lani. Tinatanong kung pwede makuha yung passport niya. Yun nga po sabi kailangang tubusin. Sabi suspect nasa agency pa. Di kayang i-pullout kasi kailangan ng authorization,” sabi ni Regala.

Nagbigay si Rodil ng authorization ngunit hindi pa rin niya makuha ang kanyang pasaporte nang hingan siya ni Geslaya P7,000.

Dito na nagdesisyon ang biktima na humingi ng tulong sa awtoridad.

“Ang dami ko sinayang na oras. Umabsent ako. Ma-suspended na ako. Ganun ginawa niya sa akin,” ani Rodil.

Ngunit pinabulaanan ni Geslaya ang alegasyon, idinagdag na alam ni Rodil ang polisiya ng ahensiya na may bayad ang pag-atras sa aplikasyon.

“Hindi ko naman fault ‘yun. Wala na rin kasi ako dun kasi nagsara na ang Jedi Placement Agency nung January 25, 2018,” pahayag ni Geslaya.

Kasalukuyang nakakulong ang suspek at nahaharap sa kasong light coercion, illegal holding of passport, at attempted estafa.