CA employee, 9 pa, laglag sa drug ops
Sampu umanong tulak ng ilegal na droga, kabilang ang isang empleyado ng Court of Appeals (CA), ang inaresto sa magkakasunod na police operations sa Malate, Maynila, kahapon ng umaga.
Sa pinakabagong anti-illegal drug operation, kinilala ng mga tauhan ng Malate Police Station (PS-9) Drug Enforcement Unit ang mga suspek na sina Debbie Clemente, 49, ng Malate Maynila; Kalvin Villacorta, 28, ng Malate Maynila; Enrique Gervacio De Lara, 54, empleyado ng CA, ng Quezon City; at Gracelyn de Leon, 47, ng San Pablo City.
Nagsagawa ng operasyon ang mga pulis laban sa mga suspek sa Santan Street sa San Andres, Malate, Maynila, dakong 2:00 ng madaling araw.
Nakuha sa mga suspek ang anim na pakete ng hinihinalang shabu, tatlong strip aluminum foil at P200 buy-bust money.
Naaresto rin ng awtoridad sina Victory Delos Santos, 39, ng Makati City; Graciano Almario III, 38, ng San Andres, Maynila; Vergel Beldad, 41, ng San Andres, Maynila; Edward Balda, 45, ng Pasay City; Danilo Rafael, 37, ng Paco, Maynila; at Amy Rose Garcia, 31, ng Makati City.
Nagsagawa ng anti-criminality operation ang mga tauhan PS-9 sa Zobel Roxas St., malapit sa corner Dian St., Malate Maynila, dakong 11:30 ng gabi kahapon.
Nakumpiska sa kanila ang limang pakete ng umano’y shabu.
Nahaharap ang mga suspek sa kasong paglabag sa RA 9165 (Comprehensive Dangerous Drugs Act of 2002).