R19-M pananim, R174-M irigasyon winasak ng bagyo
NUEVA ECIJA – Umabot sa P18.9 milyong pananim at P17 milyong irigasyon ang nasira sa pagbayo ng bagyong "Ompong" sa probinsiyang ito, ayon sa isang opisyal ng National Irrigation Administration-Upper Pampanga River Integrated Irrigation System (NIA-UPRIIS).
Samantala, iniulat kahapon ng Nueva Ecija Prolice Provincial 0ffice
(NEPPO) na isang apat na buwang buntis ang nasawi sa kasagsagan ng pananalasa ng bagyong Ompong sa San Jose City.
Kinilala ang biktima na si Catherine Garcia, 23, ng Zone I, Barangay Calaocan. Ayon kay Police Senior Supt. Eliseo T. Tanding, Nueva Ecija Police director, nasawi si Garcia nang mabagsakan ng punong mangga ang kanilang bahay.
Sa ulat naman ng NIA-UPRIIS, inihayag ni Engr. Arnel Domingo, NIA-UPRIIS Division-3 chief, na 756 na ektaryang taniman ang sinira ng Ompong.
Apektado ang nasa 284 na magsasaka sa Cabanatuan City, mga bayan ng
Aliaga, Zaragoza, Sta. Rosa, Jaen, at San Antonio, Nueva Ecija.
Pinakamatinding napinsala ang 370 ektaryang sakahan sa San Antonio, na nagkakahalaga ng P9.2 milyon; ang 162 ektaryang palayan ng Aliaga, na nagkakahalaga ng P4 milyon.
Nangawasak din ang irrigation infrastructure, na halagang P174 milyon. Nagiba rin ang PampangaBongabon River Integrated Irrigation Systems, Pinagsugalan Creek, Sanggalang Creek sa Jaen, gayundin ang mga kanal at kalsada sa Cabanatuan City at Sta. Rosa, Nueva Ecija; steelgates at floodway control sa Zaragoza at sloped protection dikes sa San Antonio, Nueva Ecija, at Aliaga.