R1M pabuya vs businessman killer

LEMERY, Batangas - "Sobrang sakit ng ginawa mo sa pamilya namin, sinira mo ang buhay namin, halos 50 percent ng buhay namin wala na, kaya dapat pagbayaran mo ang ginawa mo, sumuko ka na!"

Ito ang naging mensahe ni Mark John Martinez, 37, kay Rickson Closa na itinuturong suspek sa pagpatay sa kanyang amang si Orlando Martinez, isang prominenteng negosyante sa Lemery, Batangas.

Si Closa ay nahaharap sa kasong murder at may arrest warrant na inisyu ni Executive Judge Mary Jane Valeza-Maranan ng Regional Trial Court (RTC) Lemery, na may petsang Agosto 29, 2018.

Si Orlando, 60, ay pinagbabaril habang sakay sa bisikleta sa Palanas Bridge, Barangay Palanas noong Hulyo 21, dakong 5:35 ng madaling araw.

Naniniwala umano ang pamilya Martinez na ang pagkakautang ng suspek ang motibo sa pamamaslang.

Ayon sa pamilya, isang araw bago ang pamamaril ay nagkasagutan sa telepono ang biktima at suspek dahil sa subpoena na inisyu kay Closa.

Tinulungan umano ng biktima si Closa sa mga negosyo nito, gayundin sa pagtatayo ng gasolinahan kung saan pinahiram ng gasolina ang suspek sa halagang P800,000.

Ayon naman kay Chief Inspector Alfie Salang, hepe ng Lemery Police, nakilala umano ng saksi ang suspek at natukoy sa kuha ng closed-circuit television (CCTV) camera ang Honda CRV na ginamit sa pagtakas.

Tinakpan umano ang conduction sticker ng sasakyan subalit nang mapagtagni-tagni ang mga footages mula Lemery hanggang Alitagtag ay natukoy ang nasabing sasakyan na umano’y pag-aari ng suspek.

Kaugnay nito, naglaan ng P1M milyong pabuya ang pamilya sa sinumang makapagtuturo sa suspek. Maaaring makipag-ugnayan at tumawag sa 09777407534 o sa awtoridad.